BANW vs INDW: బంగ్లాతో తొలి టీ20.. భారత్ ఘన విజయం

సిల్హెట్‌: బంగ్లాదేశ్‌తో ఐదు టీ20ల సిరీస్‌లో భారత మహిళల జట్టు శుభారంభం చేసింది. సిల్హెట్‌ వేదికగా జరిగిన తొలి మ్యాచ్‌లో 44 పరుగుల తేడాతో ప్రత్యర్థిని ఓడించింది. ఈ మ్యాచ్‌లో హర్మన్‌ప్రీత్‌ సేన టాస్‌ గెలిచి తొలుత బ్యాటింగ్‌ ఎంచుకుంది. షెఫాలీ వర్మ(31), యస్తికా భాటియా (36), హర్మన్‌ ప్రీత్‌(30), రిచా ఘోష్‌(23) రాణించడంతో నిర్ణీత 20 ఓవర్లలో 7 వికెట్ల నష్టానికి 145 పరుగులు చేసింది. ఆ తర్వాత ఛేదనకు దిగిన బంగ్లా బ్యాటర్లను టీమ్‌ఇండియా బౌలర్లు ఏ దశలోనూ కుదురుకోనివ్వలేదు. రేణుకా ఠాకూర్‌ 3, పూజా వస్త్రాకర్‌ 2 వికెట్లతో విజృంభించడంతో.. ప్రత్యర్థి జట్టు 8 వికెట్లు కోల్పోయి 101 పరుగులు మాత్రమే చేసింది. ఆ జట్టు సారథి నిగర్‌ సుల్తానా (51) ఒక్కరే పోరాడినా ఫలితం లేకపోయింది. రేణుకా ప్లేయర్‌ ఆఫ్‌ ది మ్యాచ్‌గా నిలిచారు. రెండో టీ20 ఈ నెల 30న జరగనుంది.