Rohit on Retirement: అప్పటి వరకూ ఆడాలని ఉంది.. రోహిత్ ఆసక్తికర వ్యాఖ్యలు

ఇంటర్నెట్ డెస్క్: భారత కెప్టెన్‌ రోహిత్ శర్మ (Rohit Sharma) వెస్టిండీస్‌ పర్యటనలో ఉన్నాడు. ప్రస్తుతం విండీస్‌తో జరుగుతున్న టీ20 సిరీస్‌లో (WI vs IND) రోహిత్ ఆడటం లేదు. అతడి స్థానంలో హార్దిక్‌ పాండ్య (Hardik Pandya) కెప్టెన్సీ బాధ్యతలు చేపట్టాడు. గత కొన్ని రోజులుగా విరాట్ కోహ్లీ, రోహిత్ శర్మ పొట్టి ఫార్మాట్‌ ఆడని విషయం తెలిసిందే. ఈ క్రమంలో భారత్‌ వేదికగా జరగనున్న వన్డే ప్రపంచకప్‌ అనంతరం రోహిత్ శర్మ రిటైర్‌మెంట్‌ తీసుకుంటాడనే ఊహాగానాలు మొదలయ్యాయి. అయితే, తాజాగా అమెరికాలో జరిగిన ఓ కార్యక్రమంలో మాట్లాడుతూ.. క్రికెట్‌కు వీడ్కోలుపై ఆసక్తికర వ్యాఖ్యలు చేశాడు. 

ఐపీఎల్‌లో విరాట్ - గంభీర్‌ ఎపిసోడ్‌.. దూకుడు ఎప్పుడూ మంచిదే

‘‘వచ్చే ఏడాది జూన్‌లో టీ20 ప్రపంచకప్‌ వెస్టిండీస్‌ / అమెరికా వేదికలుగా జరగనుంది. ఇక్కడకు రావడానికి కూడా అదే కారణం. ప్రతి ఒక్కరూ ఆసక్తిగా ఎదురు చూస్తుంటారని ఆశిస్తున్నా. నాక్కూడా కూడా బరిలోకి దిగాలని ఉంది’’ అని వ్యాఖ్యానించాడు. దీంతో పొట్టి కప్‌ మెగా టోర్నీలో రోహిత్ శర్మ ఆడే అవకాశాలూ ఉన్నట్లు అభిమానులు నెట్టింట కామెంట్లు కురిపిస్తున్నారు. 

సీనియర్లు లేకుండానే ఆడారు: ముకుంద్

‘‘వెస్టిండీస్‌తో తొలి టీ20 మ్యాచ్‌లో భారత్‌ ఓడిపోవడంపై చాలామంది అతిగా స్పందిస్తున్నారు. కానీ, ఇక్కడ కీలకమైన విషయం మరొకటి ఉంది. యువకులతో కూడిన జట్టు హార్డ్‌ హిట్టర్లు ఉన్న విండీస్‌తో తలపడింది. రోహిత్, విరాట్, జడేజా, బుమ్రా, షమీ లేకుండా ఆడారు. కాబట్టి, ఇందులో కంగారు పడాల్సిన అవసరమేమీ లేదు. టీమ్‌ఇండియా ఆడిన విధానం బాగుంది. చివర్లో కొన్ని తప్పులు చేయడంతో ఓటమి చవిచూశారు. తప్పకుండా  వాటి నుంచి నేర్చుకుని విజయాలు నమోదు చేస్తుంది’’ అని సీనియర్‌ ఆటగాడు అభినవ్‌ ముకుంద్‌ వ్యాఖ్యానించాడు.