Tilak Varma: నా తొలి హాఫ్ సెంచరీ.. సమైరాకి అంకితం: తిలక్ వర్మ

ఇంటర్నెట్ డెస్క్‌: వెస్టిండీస్‌పై టీ20లతో (WI vs IND) అంతర్జాతీయ క్రికెట్‌లోకి అడుగు పెట్టిన హైదరాబాద్‌ యువ ఆటగాడు తిలక్ వర్మ (Tilak Varma) అదరగొట్టేస్తున్నాడు. ఇప్పటి వరకు జరిగిన రెండు టీ20ల్లోనూ భారత్‌ తరఫున టాప్‌ స్కోరర్‌గా నిలవడం గమనార్హం. మొదటి టీ20 మ్యాచ్‌లో 39 పరుగులు చేసిన తిలక్‌.. రెండో మ్యాచ్‌లో కెరీర్‌లో తొలి హాఫ్ సెంచరీ (51) మార్క్‌ను తాకాడు. అయితే, రెండు మ్యాచుల్లోనూ టీమ్‌ఇండియా (Team India) ఓడిపోయినప్పటికీ అతడి ఇన్నింగ్స్‌లు మాత్రం అభిమానులను ఆకట్టుకున్నాయి. ఈ క్రమంలో తన తొలి హాఫ్ సెంచరీని కెప్టెన్ రోహిత్ శర్మ కుమార్తె సమైరాకి (Samaira) అంకితం ఇస్తున్నట్లు తెలిపాడు. దీనికిగల కారణం ఏంటో కూడా వెల్లడించాడు. 

నాతో సహా.. బ్యాటర్లు మరింత బాధ్యత తీసుకోవాలి: హార్దిక్‌

‘‘రోహిత్ శర్మ - రితికా దంపతుల కుమార్తె సమైరాకి నా తొలి అర్ధశతకం అంకితం చేస్తున్నా. ముంబయి జట్టుతో ఐపీఎల్‌లో ఆడుతున్న సమయంలో సమైరాతో అనుబంధం ఏర్పడింది. అంతర్జాతీయ కెరీర్‌లో నేను చేసే తొలి సెంచరీ లేదా హాఫ్ సెంచరీని  అంకితం ఇస్తానని తనకు ప్రామిస్ చేశా. ఇప్పుడు సంబరాలను ఆమెతో చేసుకుంటా’’ అని తిలక్‌ తెలిపాడు. హాఫ్‌ సెంచరీతో అదరగొట్టిన తిలక్‌ వర్మ ఓ అరుదైన ఘనత సాధించాడు. అంతర్జాతీయ టీ20ల్లో అతి తక్కువ వయస్సులో హాఫ్‌ సెంచరీ చేసిన రెండో భారత ఆటగాడిగా తిలక్‌ వర్మ రికార్డులకెక్కాడు. ఈ ఘనతను కేవలం 20 ఏళ్ల 271 రోజుల వయస్సులో అందుకున్నాడు. రోహిత్‌ శర్మ ఈ ఘనతను 20 ఏళ్ల 143 రోజుల వయస్సులో సాధించడం గమనార్హం.