China: భారత్‌ పర్యటనకు చైనా రక్షణ మంత్రి

ఇంటర్నెట్‌డెస్క్‌: చైనా(China) రక్షణ మంత్రి లీషాంగ్‌ఫూ, రష్యా(Russia) డిఫెన్స్‌ మినిస్టర్‌ సెర్గీ షోయగులు భారత్‌లో పర్యటించనున్నారు. వీరు వచ్చే వారం న్యూదిల్లీలో జరగనున్న షాంఘై కోఆపరేషన్ ఆర్గనైజేషన్‌(SCO) మీటింగ్‌లో పాల్గొనున్నారు. ఈ విషయాన్ని ఆయా దేశాలు ధ్రువీకరించాయి. ఎస్‌సీవో రక్షణ మంత్రుల సమావేశం ఏప్రిల్‌ 27, 28 తేదీల్లో భారత్‌లో జరగనుంది. ఈ సమావేశానికి భారత రక్షణ మంత్రి రాజ్‌నాథ్‌ సింగ్‌ అధ్యక్షత వహించనున్నారు. ఉగ్రవాదం, ప్రాంతీయ భద్రత, ఆఫ్గానిస్థాన్‌లోని భద్రతా పరిస్థితి వంటి అంశాలపై చర్చించనున్నారు. మరోవైపు పాక్‌ రక్షణ మంత్రి ఖ్వాజా ఆసీఫ్‌ను కూడా ఈ సదస్సుకు ఆహ్వానించారు. కానీ, ఇప్పటి వరకు పాక్‌ మంత్రి హాజరుపై ఎటువంటి ధ్రువీకరణ రాలేదు.

2020లో గల్వాన్‌ ఘర్షణ తర్వాత చైనా రక్షణ మంత్రి భారత్‌ను సందర్శించడం ఇదే తొలిసారి. ఓ వైపు సరిహద్దుల్లో కొన్ని పాయింట్ల వద్ద ఇరు దేశాల మధ్య విభేదాలు కొనసాగుతున్న సమయంలో  లీషాంగ్‌ పర్యటన జరగనుంది. మరోవైపు గతేడాది కూడా తవాంగ్‌ సెక్టార్‌లో యాంగత్సే వద్ద భారత్‌-చైనా దళాలు ఘర్షణపడిన విషయం తెలిసిందే. ఈ నేపథ్యంలో లీషాంగ్‌ఫూ పర్యటన ప్రాధాన్యం సంతరించుకొంది. మరోవైపు రష్యా రక్షణ మంత్రి షోయిగు కూడా ఉక్రెయిన్‌ యుద్ధం మొదలయ్యాక తొలిసారి భారత్‌లో పర్యటించనున్నారు. భారత్‌-రష్యాల మధ్య ఉన్నత స్థాయిలో జరుగుతున్న సమావేశాల్లో ఇది కూడా భాగంగా నిలవనుంది.  

మే 5వ తేదీ నుంచి గోవాలో జరగనున్న ఎస్‌సీవో విదేశాంగ మంత్రుల సమావేశానికి మాత్రం పాక్‌మంత్రి బిలావల్‌ భుట్టో జర్దారీ హాజరుకానున్నారు. ఈ మేరకు ఇప్పటికే పాక్‌ నుంచి అధికారిక ధ్రువీకరణ వచ్చింది. కానీ, అదే సమయంలో పూంచ్‌లో సైనిక వాహనంపై దాడి జరిగడంతో ఉద్రిక్త పరిస్థితి నెలకొంది. దర్యాప్తులో పాక్‌ పాత్రపై స్పష్టమైన ఆధారాలు లభ్యమైతే పరిస్థితి ఇబ్బందికరంగా మారవచ్చు.