మైక్రోసాఫ్ట్‌ ఆరోపణలు అర్థరహితం

అమెరికా సైబర్‌ కార్యకలాపాల నుంచి దృష్టి మళ్లించే చర్య: చైనా

హాంకాంగ్‌: ఐరోపాలోని పలు ప్రభుత్వాల ఈ మెయిళ్లను తమ దేశానికి చెందిన హ్యాకింగ్‌ గ్రూపు హ్యాక్‌ చేసిందని మైక్రోసాఫ్ట్‌ నివేదిక పేర్కొనడాన్ని చైనా తప్పుబట్టింది. ఇది తప్పుడు సమాచారమని, అమెరికా సైబర్‌ కార్యకలాపాల నుంచి దృష్టి మళ్లించడానికే ఆ సంస్థ ఈ ఆరోపణలు చేసిందని విమర్శించింది. స్టార్మ్‌-0558 పేరుతో ఉన్న గ్రూపు 25 ప్రభుత్వ సంస్థలకు చెందిన ఈ మెయిళ్లను హ్యాక్‌ చేసిందని, అందులో ఐరోపాలోని ప్రభుత్వాల ఈ మెయిళ్లు ఉన్నాయని మంగళవారం మైక్రోసాఫ్ట్‌ తన బ్లాగ్‌ పోస్టులో పేర్కొంది. తమ మెయిళ్లలో అసాధారణ కార్యకలాపాలను గుర్తించి వినియోగదారులు ఫిర్యాదు చేయడంతో ఈ విషయం వెలుగులోకి వచ్చిందని తెలిపింది. ‘ఇది గూఢచర్యంలో భాగంగా చోటుచేసుకున్న పరిణామం. నిఘా వర్గాలు ఇటువంటి సమాచారాన్ని సేకరిస్తుంటాయి’ అని మైక్రోసాఫ్ట్‌ కార్యనిర్వాహక ఉపాధ్యక్షుడు చార్లీ బెల్‌ వెల్లడించారు. అమెరికా ప్రభుత్వ ఈ మెయిళ్లనూ చైనా గ్రూపు హ్యాక్‌ చేసిందని వాషింగ్టన్‌ పోస్టు నివేదిక పేర్కొంది. ఈ ఆరోపణలను చైనా విదేశాంగశాఖ అధికార ప్రతినిధి వాంగ్‌ వెన్‌బిన్‌ ఖండించారు. ‘ఈ ఆరోపణలను ఏ సంస్థ చేసిందన్నది కాదు. అసలు ప్రపంచంలోనే అతి పెద్ద హ్యాకర్‌ అమెరికా అన్నది ఎప్పటికీ మారని వాస్తవం. ఆ దేశమే అత్యధిక సైబర్‌ చౌర్యానికి పాల్పడుతోంది’ అని ఆయన స్పష్టం చేశారు. మరోవైపు ఈ నివేదిక ఆధారంగా దర్యాప్తు జరుగుతోందని అమెరికా జాతీయ భద్రతా సలహాదారు జేక్‌ సలీవాన్‌ తెలిపారు.