కిందపడేసి, మోకాలితో అదిమిపెట్టి..

అమెరికాలో పోలీసుల కర్కశత్వానికి మరో ఆఫ్రో-అమెరికన్‌ బలి

వాషింగ్టన్‌: అగ్రరాజ్యం అమెరికాలో పోలీసుల కర్కశత్వానికి ఫ్రాంక్‌ టైసన్‌ (53) అనే ఆఫ్రో-అమెరికన్‌ ప్రాణాలు కోల్పోయాడు. ఇందుకు సంబంధించి ఒహాయో పోలీసుల బాడీకామ్‌ దృశ్యాలు వెలుగులోకి రావడంతో తీవ్ర విమర్శలు వ్యక్తం అవుతున్నాయి. ఏప్రిల్‌ 18న కారులో వెళుతున్న టైసన్‌ తూర్పు కాంటన్‌లో ఓ యుటిలిటీ స్తంభాన్ని ఢీ కొట్టాడు. అనంతరం బార్‌లోకి పారిపోయినట్లు గస్తీ అధికారులు గుర్తించారు. ఫ్రాంక్‌ను అదుపులోకి తీసుకొనే క్రమంలో అతడికి, పోలీసులకు మధ్య తీవ్ర వాగ్వాదం చోటుచేసుకుంది. అధికారులు తనను చంపడానికి వస్తున్నారంటూ టైసన్‌ కేకలు వేస్తున్న దృశ్యాలు వీడియోలో కనిపించాయి. ఆ తర్వాత పోలీసులు అతడిని కిందపడేసి, చేతికి బేడీలు వేశారు. ఒక అధికారి ఫ్రాంక్‌ మెడపై మోకాలితో అదిమిపట్టాడు. ‘నాకు ఊపిరాడడం లేదు’ అని అతడు మొత్తుకుంటున్నా వినిపించుకోకపోగా.. అరవొద్దు అంటూ గదమాయించాడు. కొద్దిసేపటికి టైసన్‌లో ఎలాంటి చలనం లేనట్లు వారికి అర్థమైంది. దాంతో పోలీసులు అతడికున్న బేడీలు తీసి, సీపీఆర్‌ చేశారు. తర్వాత స్థానిక ఆసుపత్రికి తరలించారు. అక్కడ చికిత్స పొందుతూ టైసన్‌ ప్రాణాలు విడిచాడు. గతంలో జార్జి ఫ్లాయిడ్‌ అనే వ్యక్తి ఇదే తరహాలో ప్రాణాలు కోల్పోయారు.