H-1B visa: హెచ్‌-1బీ వీసాదారులకు అమెరికాలోనే రెన్యువల్‌.. కానీ..!

ఇంటర్నెట్‌ డెస్క్‌: హెచ్‌-1బీ వీసా (H-1B visa) పునరుద్ధరణ విధానాన్ని మరింత సరళీకరించేందుకు అమెరికా పలు చర్యలు తీసుకుంటున్న విషయం తెలిసిందే. ఈ క్రమంలో కొన్ని కేటగిరీల హెచ్‌-1బీ వీసాలను దేశీయంగానే రెన్యువల్‌ చేసుకునేలా ఓ పైలట్‌ కార్యక్రమాన్ని ఇటీవల ప్రారంభించింది. మూడు నెలల పాటు ఈ ప్రోగ్రామ్‌ అందుబాటులో ఉంటుందని అమెరికా విదేశాంగ వెల్లడించింది. అయితే, ఇది కేవలం నిపుణులకు మాత్రమేనని, వారి కుటుంబీకులకు/వారిపై ఆధారపడిన వారికి ఇది వర్తించదని తెలిసింది.

వీసా రెన్యువల్‌ కోసం గతంలో అమెరికా విడిచి వెళ్లాల్సి వచ్చేదని.. కానీ, ఈ నూతన కార్యక్రమం గణనీయ మార్పు తీసుకువస్తుందని వీసా సేవల డిప్యూటీ అసిస్టెంట్‌ సెక్రటరీ జూలీ స్టఫ్‌ తెలిపారు. ఈ సౌలభ్యాన్ని నిపుణుల కుటుంబీకులకు విస్తృత పరిచేముందు వాటి ప్రభావాన్ని అంచనా వేయాల్సి ఉందన్నారు. హెచ్‌-4 కింద వారి కుటుంబీకులు/ఆధారపడిన వారిని ఇందులో చేర్చాలని కోరుతూ ఆయా సంస్థల నుంచి వినతులు వచ్చిన నేపథ్యంలో ఇలా స్పందించారు.

Green Card: గ్రీన్‌కార్డు ‘జీవిత కాలం’ లేటు

అమెరికాలోనే వీసా పునరుద్ధరించే ఈ పైలట్‌ ప్రోగ్రామ్‌ కింద తొలుత 20వేల మందికి వీసా రెన్యువల్‌ చేయనున్నారు. దీనికి దరఖాస్తు చేసుకునేవారు అమెరికా విదేశాంగశాఖకు వీసాలను పంపించాల్సి ఉంటుంది. ఈ సమయంలో వారు దేశం విడిచి వెళ్లేందుకు వీలులేదు. గతంతో వీరంతా స్వదేశానికి వెళ్లాల్సి వచ్చేది. అయితే, తాజా కార్యక్రమం కింద 20వేల మందిని ఎలా ఎంపిక చేస్తారనే విషయాన్ని అమెరికా అధికారులు వెల్లడించలేదు.