Canada: కెనడాలో పంజాబ్‌ యువతి హత్య.. భారత్‌కు పరారైన అనుమానితుడు..!

ఇంటర్నెట్‌ డెస్క్‌: కెనడాలో ఓ భారత యువతి దారుణ హత్యకు గురైంది. పంజాబ్‌కు చెందిన అమన్‌ప్రీత్‌ సైనీ ఇటీవల తీవ్ర గాయాలతో ప్రాణాలు కోల్పోయింది. (Woman Murdered In Canada) ఈ కేసులో మరో భారతీయుడిని పోలీసులు అనుమానితుడిగా భావిస్తున్నారు. అతడి కోసం గాలింపు చేపట్టారు. అయితే, ఇప్పటికే అతడు భారత్‌కు పారిపోయినట్లు కథనాలు వెలువడుతున్నాయి. వివరాల్లోకి వెళితే..

 పంజాబ్‌లోని సంగ్రూర్‌కు చెందిన 27 ఏళ్ల సైనీ గత కొన్నేళ్ల క్రితం కెనడా వెళ్లి టొరంటోలో నివసిస్తున్నారు. గతవారం ఆమె లింకన్‌ ప్రాంతంలోని ఓ పార్కులో తీవ్ర గాయాలతో విగతజీవిగా కన్పించింది. సమాచారం అందుకున్న పోలీసులు ఘటనాస్థలానికి చేరుకుని దర్యాప్తు చేపట్టారు. సైనీని హత్య చేసినట్లు ప్రాథమికంగా నిర్ధరించిన పోలీసులు.. మరో భారతీయుడు మన్‌ప్రీత్ సింగ్‌ను అనుమానితుడిగా పేర్కొన్నారు. అతడిని వాటెండ్‌గా ప్రకటిస్తూ గాలింపు చేపట్టారు. అతడి ఫొటోను కూడా విడుదల చేశారు. అయితే ఇప్పటికే అతడు దేశం విడిచి పారిపోయినట్లుగా అనుమానిస్తున్నారు. హత్యకు గల కారణాలపై దర్యాప్తు కొనసాగుతోంది. మన్‌ప్రీత్‌ ఆచూకీ కోసం కెనడా అధికారిక వర్గాలు భారత్‌ను సంప్రదించినట్లు తెలుస్తోంది.