Breaking | Feedback | ePratibha | E-PAPER | Pratibha

IND vs NZ: ప్రపంచ కప్‌ ఫైనల్‌కు భారత్‌..

టీమ్‌ఇండియా ప్రపంచకప్ ఫైనల్‌కు చేరింది. భారత్ సెమీ ఫైనల్‌లో న్యూజిలాండ్‌పై 70 పరుగుల తేడాతో విజయం సాధించింది.

Updated : 15 Nov 2023 22:32 IST

15/11/2023 22:28(IST)

న్యూజిలాండ్ ఆలౌట్.. ప్రపంచకప్ ఫైనల్‌కు భారత్

టీమ్‌ఇండియా ప్రపంచకప్ ఫైనల్‌కు చేరింది. భారత్ సెమీ ఫైనల్‌లో న్యూజిలాండ్‌పై 70 పరుగుల తేడాతో విజయం సాధించింది.
భారత్ నిర్దేశించిన 398 పరుగుల భారీ లక్ష్యంతో బరిలోకి దిగిన న్యూజిలాండ్.. 48.5 ఓవర్లలో 327 పరుగులకు ఆలౌటైంది.
భారత పేసర్ మహ్మద్ షమి (7/57) కివీస్ పతనాన్ని శాసించాడు.

15/11/2023 20:47(IST)

అదే జోరు

న్యూజిలాండ్ బ్యాటర్లు భారత బౌలర్లను సమర్థవంతంగా ఎదుర్కొంటున్నారు.
బుమ్రా వేసిన 31 ఓవర్లో 14 పరుగులు రాబట్టారు.
తొలి బంతికి డారిల్ మిచెల్ (98) సిక్స్ బాది సెంచరీకి చేరువయ్యాడు.
కేన్ విలియమ్సన్ (64) ఐదో బంతికి ఫోర్ బాదాడు.
31 ఓవర్లకు స్కోరు 213/2.

15/11/2023 20:40(IST)

షమి క్యాచ్‌ డ్రాప్‌

విలియమ్సన్ మరోసారి ఔటయ్యే ప్రమాదం నుంచి తప్పించుకున్నాడు.
బుమ్రా వేసిన 29 ఓవర్‌లో ఐదో బంతికి విలియమ్సన్ ఇచ్చిన సులువైన క్యాచ్‌ని షమి అందుకోలేకపోయాడు.
29 ఓవర్లకు స్కోరు 188/2. డారిల్ మిచెల్ (84), కేన్‌ విలియమ్సన్ (53) పరుగులతో ఉన్నారు.

15/11/2023 20:34(IST)

వికెట్‌కు ప్రయత్నిస్తున్నా

భారత బౌలర్లు వికెట్ కోసం విశ్వప్రయత్నం చేస్తున్నా న్యూజిలాండ్ బ్యాటర్లు ఏ మాత్రం అవకాశం ఇవ్వడం లేదు.
నిలకడగా బౌండరీలు బాదుతూ స్కోరు బోర్డును పరుగులు పెట్టిస్తున్నారు.
కుల్‌దీప్‌ యాదవ్ వేసిన 28 ఓవర్‌లో ఆరు పరుగులు వచ్చాయి.
28 ఓవర్లకు స్కోరు 180/2. మిచెల్ (78), విలియమస్సన్ (51) పరుగులతో ఉన్నారు.

15/11/2023 20:29(IST)

విలియమ్సన్ అర్ధ శతకం

కేన్ విలియమ్సన్‌ కూడా అర్ధ శతకం పూర్తి చేసుకున్నాడు.
కుల్‌దీప్‌ యదవ్‌ వేసిన మూడో బంతికి సింగిల్ తీసి హాఫ్ సెంచరీ మార్క్‌ అందుకున్నాడు.
తర్వాత జడేజా వేసిన ఓవర్‌లో 9 పరుగులు వచ్చాయి.
ఈ ఓవర్‌లో మిచెల్ ఓ సిక్స్ బాదాడు.
27 ఓవర్లకు స్కోరు 174/2.

15/11/2023 20:20(IST)

దిగ్గజాలతో వెంకటేశ్

ముంబయిలోని వాంఖడే స్టేడియంలో జరుగుతున్న భారత్, న్యూజిలాండ్ మ్యాచ్‌ను టాలీవుడ్‌ హీరో వెంకటేశ్ వీక్షిస్తున్నారు.
ఈ సందర్భంగా వెంకటేశ్.. ఇంగ్లాండ్ మాజీ ఫుట్‌బాల్ ప్లేయర్ డేవిడ్ బెక్‌హమ్‌, వెస్టిండీస్ క్రికెట్ దిగ్గజం వివియన్ రిచర్డ్స్‌తో ఫొటోలు దిగారు.

15/11/2023 20:03(IST)

ఆదుకుంటున్న మిచెల్, కేన్

39 పరుగులకే రెండు వికెట్లు కోల్పోయిన కివీస్‌ను కేన్ విలియమ్సన్, డారిల్ మిచెల్ ఆదుకుంటున్నారు.
వీరు మూడో వికెట్‌కు ఇప్పటివరకు 85 పరుగుల భాగస్వామ్యాన్ని నెలకొల్పారు.
20 ఓవర్లకు స్కోరు 124/2. డారిల్ మిచెల్ (41), విలియమ్సన్ (32) పరుగులతో ఉన్నారు.

15/11/2023 19:56(IST)

బతికిపోయిన కేన్

కేన్ విలియమ్సన్ త్రుటిలో ఔటయ్యే ప్రమాదం నుంచి తప్పించుకున్నాడు.
కుల్‌దీప్‌ వేసిన 18 ఓవర్‌లో ఐదో బంతికి కేన్ రనౌట్ అయ్యేవాడు.
బంతి వికెట్లను తాకకముందే వికెట్ కీపర్ కేఎల్‌ రాహుల్ గ్లోవ్‌ని స్టంప్స్‌కి తాకించాడు.
తర్వాత బంతి వికెట్లకు తాకినా అప్పటికే కేన్ క్రీజులోకి వచ్చేశాడు.

15/11/2023 19:38(IST)

విలియమ్సన్ సిక్స్, ఫోర్

సిరాజ్ వేసిన 15 ఓవర్‌లో 13 పరుగులు వచ్చాయి.
మొదటి బంతికి విలియమ్సన్ సిక్స్ బాదాడు.
నాలుగో బంతిని విలియమ్సన్ డిఫెన్స్‌ ఆడేందుకు ప్రయత్నించగా.. బంతి బ్యాట్ ఎడ్జ్‌కు తాకి వికెట్ కీపర్ పక్క నుంచి వెళ్లి బౌండరీని తాకింది.
15 ఓవర్లకు స్కోరు 87/2. విలియమ్సన్ (23), డారిల్ మిచెల్ (17) పరుగులతో ఉన్నారు.

15/11/2023 19:32(IST)

జడేజా 2.. సిరాజ్ 10

కివీస్ బ్యాటర్లు నిలకడగా ఆడుతున్నారు.
గత రెండు ఓవర్లలో 12 పరుగులు రాబట్టారు.
సిరాజ్ వేసిన 13 ఓవర్‌లో 10 పరుగులు, జడేజా వేసిన తర్వాతి ఓవర్‌లో రెండు రన్స్‌ వచ్చాయి.
14 ఓవర్లకు స్కోరు 74/2. విలియమ్సన్ (11), డారిల్ మిచెల్ (16) పరుగులతో ఉన్నారు.

15/11/2023 18:50(IST)

ఫస్ట్ బాల్‌కే వికెట్

షమి తన తొలి ఓవర్‌లో మొదటి బంతికే వికెట్ పడగొట్టాడు.
అతడు వేసిన ఇన్నింగ్స్‌ ఆరో ఓవర్‌లో తొలి బంతికి డేవాన్ కాన్వే (13) ఔటయ్యాడు.
కాన్వే.. వికెట్ కీపర్ రాహుల్‌కు క్యాచ్‌ ఇచ్చాడు.
తర్వాత వచ్చిన విలియమ్సన్ (4) ఈ ఓవర్‌లో చివరి బంతికి ఫోర్ కొట్టాడు.
6 ఓవర్లు ముగిసేసరికి స్కోరు 34/1. రచిన్ రవీంద్ర (8) పరుగులతో ఉన్నాడు.

15/11/2023 18:43(IST)

బౌండరీలే

కివీస్ ఓపెనర్లు సింగిల్స్‌ కంటే బౌండరీలకే ఎక్కువ ప్రాధాన్యత ఇస్తున్నారు.
ఇప్పటివరకు ఆ జట్టు 23 పరుగులు చేయగా.. ఇందులో 20 పరుగులు బౌండరీల ద్వారా వచ్చినవే.
సిరాజ్ వేసిన నాలుగో ఓవర్‌లో ఐదో బంతికి రచిన్ రవీంద్ర బౌండరీ బాదగా.. మిగతా బంతులకు పరుగులు రాలేదు.
4 ఓవర్లకు స్కోరు 23/0.

15/11/2023 17:51(IST)

టీమ్‌ఇండియా భారీ స్కోరు

న్యూజిలాండ్‌తో జరుగుతున్న సెమీ ఫైనల్‌ మ్యాచ్‌లో టీమ్ఇండియా భారీ స్కోరు సాధించింది.
నిర్ణీత 50 ఓవర్లలో నాలుగు వికెట్ల నష్టానికి 397 పరుగులు చేసింది.
కోహ్లీ (117), శ్రేయస్ (105) శతకాలతో అదరగొట్టారు.
శుభ్‌మన్ గిల్ (80 నాటౌట్), రోహిత్ శర్మ (47) రాణించారు.
కేఎల్ రాహుల్ (39 నాటౌట్; 20 బంతుల్లో 5 ఫోర్లు, 2 సిక్స్‌లు) చివర్లో మెరుపులు మెరిపించాడు.
కివీస్ బౌలర్లలో టిమ్ సౌథీ మూడు వికెట్లు పడగొట్టి 100 పరుగులు సమర్పించుకోగా.. ట్రెంట్ బౌల్ట్‌కు ఒక వికెట్ దక్కింది.

15/11/2023 17:45(IST)

అయ్యర్ ఔట్

శ్రేయస్ అయ్యర్ (105) ఔటయ్యాడు.
ట్రెంట్ బౌల్ట్ వేసిన 49 ఓవర్‌లో ఐదో బంతికి డారిల్ మిచెల్‌కు చిక్కాడు.
అంతకుముందు ఇదే ఓవర్‌లో రాహుల్ ఓ సిక్స్, ఫోర్ బాదగా.. శ్రేయస్ బౌండరీ రాబట్టాడు.
49 ఓవర్లకు స్కోరు 382/3. రాహుల్ (25), సూర్యకుమార్ (1) క్రీజులో ఉన్నారు.

15/11/2023 17:37(IST)

శ్రేయస్ సెంచరీ

శ్రేయస్ అయ్యర్ కూడా సెంచరీ (67 బంతుల్లో) పూర్తి చేసుకున్నాడు.
సౌథీ వేసిన 48 ఓవర్‌లో తొలి బంతికి సిక్స్‌ బాదిన శ్రేయస్.. తర్వాతి బంతికి సింగిల్ తీసి శతకం అందుకున్నాడు.
అతడికిది వరుసగా రెండో సెంచరీ కావడం విశేషం.
48 ఓవర్లకు స్కోరు 366/2. కేఎల్ రాహుల్ (14), శ్రేయస్ (101) క్రీజులో ఉన్నారు.

15/11/2023 17:21(IST)

కోహ్లీ ఔట్

విరాట్ కోహ్లీ (117) ఔటయ్యాడు.
సౌథీ వేసిన 44 ఓవర్‌లో చివరి బంతికి కాన్వేకు చిక్కాడు.
ఇదే ఓవర్‌లో మూడో బంతికి కోహ్లీ భారీ షాట్ ఆడగా.. ఫిలిప్స్ క్యాచ్‌ అందుకోలేకపోయాడు.
తర్వాత ఓ సిక్స్‌ బాదిన కోహ్లీ.. చివరి బంతికి ఔటయ్యాడు.
44 ఓవర్లకు స్కోరు 327/2.

15/11/2023 16:47(IST)

శ్రేయస్ హాఫ్‌ సెంచరీ

శ్రేయస్ అయ్యర్ 35 బంతుల్లో అర్ధ శతకం పూర్తి చేసుకున్నాడు.
అతడు ఈ ప్రపంచకప్‌లో వరుసగా నాలుగుసార్లు 50 కంటే ఎక్కువ పరుగులు చేయడం విశేషం.
37 ఓవర్లకు స్కోరు 270/1. కోహ్లీ (89), శ్రేయస్ (51) క్రీజులో ఉన్నారు.

15/11/2023 16:43(IST)

అదే జోరు

శ్రేయస్ అయ్యర్ దూకుడు కొనసాగిస్తున్నాడు.
ట్రెంట్ బౌల్ట్ వేసిన 36 ఓవర్‌లో మూడు, నాలుగు బంతులకు వరుసగా సిక్స్, ఫోర్ బాదేశాడు.
36 ఓవర్లకు స్కోరు 265/1. శ్రేయస్ (49) అర్ధ శతకానికి చేరువ కాగా.. కోహ్లీ (86) శతకం దిశగా సాగుతున్నాడు.

15/11/2023 16:40(IST)

శ్రేయస్ దూకుడు

శ్రేయస్ అయ్యర్ దూకుడు పెంచాడు.
గ్లెన్ ఫిలిప్స్‌ వేసిన 34 ఓవర్లో ఓ సిక్స్‌ బాదాడు. ఈ మ్యాచ్‌లో అతడికిది మూడో సిక్సర్.
మిచెల్ శాంట్నర్ వేసిన 35 ఓవర్‌ మెయిడిన్.
35 ఓవర్లకు స్కోరు 248/1. కోహ్లీ (80), శ్రేయస్ (38) పరుగులతో ఉన్నారు.

15/11/2023 16:03(IST)

కోహ్లీ హాఫ్‌ సెంచరీ

విరాట్ కోహ్లీ 59 బంతుల్లో అర్ధ శతకం పూర్తి చేసుకున్నాడు.
రచిన్ రవీంద్ర వేసిన 27 ఓవర్‌లో చివరి బంతికి సింగిల్ తీసి వన్డేల్లో 72వ అర్ధ శతకం అందుకున్నాడు.
ఇదే ఓవర్‌లో మూడు, నాలుగు బంతులకు శ్రేయస్ అయ్యర్‌ వరుసగా సిక్స్, ఫోర్ బాదాడు.
27 ఓవర్లకు స్కోరు 194/1.

15/11/2023 15:48(IST)

మైదానం వీడిన గిల్

కాళ్లకు తిమ్మిరులు రావడంతో శుభ్‌మన్ గిల్ (79*) రిటైర్డ్ హర్ట్‌గా మైదానం వీడాడు. దీంతో స్థానంలో శ్రేయస్ అయ్యర్ క్రీజులోకి వచ్చాడు.
23 ఓవర్లకు స్కోరు 164/1. శ్రేయస్ అయ్యర్ (0), కోహ్లీ (35) క్రీజులో ఉన్నారు.

15/11/2023 15:39(IST)

నిలకడగా ఇన్నింగ్స్‌

22 ఓవర్లు: భారత ఇన్నింగ్స్‌ నిలకడగా సాగుతోంది.
కివీస్‌ బౌలర్లు కట్టుదిట్టంగా బౌలింగ్‌ చేస్తున్నారు.
దీంతో టీమ్ఇండియా బ్యాటర్లు ఆచితూచి ఆడారు.
గ్లెన్ ఫిలిప్స్‌ బౌలింగ్‌లో నాలుగు సింగిల్స్‌ మాత్రమే వచ్చాయి.
దీంతో భారత్ స్కోరు 157/1కి చేరింది.

15/11/2023 15:28(IST)

సింగిల్స్‌ మాత్రమే..

19 ఓవర్లు: వరుసగా రెండో ఓవర్‌లోనూ బౌండరీ రాలేదు.
శాంట్నర్ కేవలం నాలుగు సింగిల్స్‌ను మాత్రమే ఇచ్చాడు.
దీంతో భారత్ స్కోరు బోర్డులో వేగం తగ్గింది.
ప్రస్తుతం భారత్ వికెట్ నష్టానికి 142 పరుగులు చేసింది.
విరాట్ కోహ్లీ (25*), గిల్ (67*) ఉన్నారు.

15/11/2023 15:25(IST)

బౌలింగ్‌కు ఫిలిప్స్‌

18 ఓవర్లు: న్యూజిలాండ్‌ మరో బౌలర్‌ను రంగంలోకి దింపింది.
గ్లెన్‌ ఫిలిప్స్‌ ఈ ఓవర్‌ వేశాడు.
అయితే, భారత బ్యాటర్లు మాత్రం రిస్క్‌ తీసుకోలేదు.
ఆచితూచి ఆడుతూ పరుగులు రాబట్టారు.
ఈ ఓవర్‌లో ఆరు పరుగులు వచ్చాయి.
దీంతో భారత్ స్కోరు 138/1కి చేరింది.

15/11/2023 15:04(IST)

భారత్ 100+.. గిల్ 50+

శుభ్‌మన్‌ గిల్ (50*) హాఫ్‌ సెంచరీ సాధించాడు.
మరోవైపు భారత్ స్కోరు కూడా 100 దాటేసింది.
లాకీ ఫెర్గూసన్ వేసిన 13వ ఓవర్‌ తొలి రెండు బంతులను గిల్ ఫోర్‌, సిక్స్‌గా మలిచాడు.
ఈ ఓవర్‌లో 11 పరుగులు వచ్చాయి.
తర్వాత రచిన్‌ రవీంద్ర బౌలింగ్‌లో (14.3వ ఓవర్‌) సింగిల్‌తో గిల్ ఫిఫ్టీ పూర్తి చేసుకున్నాడు.

15/11/2023 14:58(IST)

శాంట్నర్ కట్టుదిట్టం

12 ఓవర్లు: మిచెల్ శాంట్నర్‌ కేవలం మూడు పరుగులను మాత్రమే ఇచ్చాడు.
మొదటి నాలుగు బంతులకు పరుగులే రాలేదు.
ఆ తర్వాత బంతిని శుభ్‌మన్‌ గిల్ (38*) రివర్స్‌ స్వీప్‌ ఆడి రెండు పరుగులు రాబట్టాడు.
బౌండరీ లైన్‌ వద్ద డేవన్‌ కాన్వే అద్భుతంగా ఫీల్డింగ్‌ చేశాడు.
ప్రస్తుతం భారత్ స్కోరు 92/1.

15/11/2023 14:48(IST)

ఫోర్‌తో కోహ్లీ పరుగుల ఖాతా

9 ఓవర్లు: రోహిత్ శర్మ ఔటైన తర్వాత క్రీజ్‌లోకి విరాట్ (4*) వచ్చాడు.
తాను ఎదుర్కొన్న రెండో బంతిని బౌండరీగా తరలించాడు.
అయితే, బంతి ఎడ్జ్‌ తీసుకుని వెళ్లడంతో ఎల్బీ కోసం కివీస్‌ ఆటగాళ్లు అప్పీలు చేశాడు.
డీఆర్‌ఎస్‌కు వెళ్లారు. కానీ సమీక్షలో నాటౌట్‌గా తేలింది.
టిమ్‌ సౌథీ 5 పరుగులు ఇచ్చాడు.
దీంతో భారత్ స్కోరు 75/1.

15/11/2023 14:42(IST)

రోహిత్ ఔట్

రోహిత్ హాఫ్ సెంచరీ మిస్‌ చేసుకున్నాడు.
టిమ్‌ సౌథీ బౌలింగ్‌లో (8.2వ ఓవర్) భారీ షాట్‌కు యత్నించిన రోహిత్ (47) విలియమ్సన్ చేతికి చిక్కాడు.
దీంతో 71 పరుగుల వద్ద భారత్ తొలి వికెట్‌ను నష్టపోయింది.
క్రీజ్‌లోకి విరాట్ కోహ్లీ వచ్చాడు.

15/11/2023 14:39(IST)

బౌలింగ్‌కు లాకీ ఫెర్గూసన్

8 ఓవర్లు: లాకీ ఫెర్గూసన్ బౌలింగ్‌కు వచ్చాడు.
శుభ్‌మన్‌ గిల్ (20*) ఈ ఓవర్‌ మొత్తం ఆడేశాడు.
కవర్స్‌, కవర్స్‌ పాయింట్ మధ్యగా కొట్టిన ఫోర్‌ హైలైట్.
ఈ ఓవర్‌లో 9 పరుగులు వచ్చాయి.
దీంతో భారత్ స్కోరు 70/0.
మరోవైపు రోహిత్ (47*) హాఫ్‌ సెంచరీకి చేరువగా ఉన్నాడు.

15/11/2023 14:27(IST)

భారత్ 50+

6 ఓవర్లు: టీమ్‌ఇండియా స్కోరు 50 పరుగులు దాటేసింది.
న్యూజిలాడ్ స్పిన్నర్‌ను రంగంలోకి తెచ్చింది.
మిచెల్ శాంట్నర్ బౌలింగ్‌లో రోహిత్ (45*) సిక్స్‌, ఫోర్ కొట్టాడు.
ఈ ఓవర్‌లో 11పరుగులు వచ్చాయి.
దీంతో భారత్ స్కోరు 58/0.

15/11/2023 14:23(IST)

ప్రపంచ కప్‌ల్లో అత్యధిక సిక్స్‌ల హీరో

రోహిత్ శర్మ (50*) వన్డే ప్రపంచకప్‌ టోర్నీల్లో అత్యధిక సిక్స్‌లు కొట్టిన బ్యాటర్‌గా నిలిచాడు. ఇప్పటి వరకు 49 సిక్స్‌లతో అగ్రస్థానంలో ఉన్న క్రిస్‌ గేల్‌ను అధిగమించాడు. కివీస్‌పై ఇప్పటికే మూడు సిక్స్‌లు బాదాడు. ఒకే ఎడిషన్‌లో అత్యధికంగా సిక్సర్లను కొట్టిన బ్యాటర్‌గానూ అవతరించాడు. ప్రస్తుతం రోహిత్ 27 సిక్స్‌లతో కొనసాగుతున్నాడు. అంతకుముందు గేల్ (2015లో) 26 సిక్స్‌లు కొట్టాడు.

15/11/2023 14:13(IST)

అదిరే సిక్స్‌

3 ఓవర్లు: బౌల్ట్‌ వేసిన ఈ ఓవర్‌లో ఏడు పరుగులు వచ్చాయి,
మంచి బంతులను గౌరవిస్తూనే రోహిత్ (16*) దూకుడు కొనసాగిస్తున్నాడు.
తొలి రెండు బంతులను ఆచితూచి ఆడిన రోహిత్ మూడో బంతిని సిక్స్‌గా మలిచాడు.
ఆ తర్వాత బౌల్ట్‌ కట్టుదిట్టంగా బంతులను సంధించాడు.
దీంతో భారత్ స్కోరు 25/0కి చేరింది.
మరోవైపు క్రీజ్‌లో గిల్ (8*) ఉన్నాడు.

15/11/2023 14:09(IST)

గిల్ కూడా..

2 ఓవర్లు: టీమ్‌ సౌథీ వేసిన ఈ ఓవర్‌లో గిల్ (8*) రెండు బౌండరీలు రాబట్టాడు.
ఫుల్లర్‌ లెంగ్త్‌తో (1.3వ ఓవర్) వచ్చిన బంతిని స్క్వేర్‌ లెగ్‌ దిశలో ఫోర్‌గా మలిచాడు.
తర్వాతి బంతిని (1.4వ ఓవర్) ఆడే క్రమంలో బ్యాట్‌ ఎడ్జ్‌ తీసుకుని వికెట్ల పక్కగా బౌండరీకి వెళ్లిపోయింంది.
ఈ ఓవర్‌లో 8 పరుగులు వచ్చాయి.
దీంతో భారత్ స్కోరు 18/0.

15/11/2023 14:05(IST)

తొలి ఓవర్‌లోనే దూకుడు

రోహిత్ శర్మ (10*) దూకుడుగా ఇన్నింగ్స్‌ మొదలుపెట్టాడు.
ట్రెంట్ బౌల్ట్‌ బౌలింగ్‌లో వరుసగా రెండు బౌండరీలు బాదేశాడు.
మొత్తం 10 పరుగులు వచ్చాయి.
తొలుత నాలుగో బంతిని మిడ్‌వికెట్‌ మీదుగా బౌండరీకి తరలించాడు.
ఐదో బాల్‌ను మిడాఫ్‌ మీదుగా అద్భుత షాట్‌తో ఫోర్ కొట్టాడు.

15/11/2023 13:43(IST)

మేం కూడా అదే అనుకున్నాం..: కేన్

‘‘ టాస్‌ గెలిస్తే మేం కూడా తొలుత బ్యాటింగ్‌ ఎంచుకున్నామని అనుకున్నాం. పిచ్‌ చాలా బాగుంది. అయితే, బంతితో తొలుత మెరుగ్గా రాణిస్తామనే నమ్మకం ఉంది. నాలుగేళ్ల కిందట ఇదే పరిస్థితులు కానీ మైదానం వేరు. ఇప్పుడు టీమ్‌ఇండియా అద్భుతమైన ఫామ్‌లో ఉంది. మా జట్టులోనూ ఎలాంటి మార్పులు చేయడం లేదు. గత మ్యాచ్‌లో బరిలోకి దిగిన జట్టుతోనే ఆడుతున్నాం’’ అని న్యూజిలాండ్‌ కెప్టెన్ కేన్‌ విలియమ్సన్ వెల్లడించాడు.

15/11/2023 13:37(IST)

జట్టులో మార్పుల్లేవు

‘‘బ్యాటింగ్‌కు పిచ్‌ అనుకూలంగా ఉంటుందనే ఉద్దేశంతోనే టాస్‌ నెగ్గాక ఎంచుకున్నా. న్యూజిలాండ్‌ అత్యంత నిలకడగా ఆడే జట్టు. అయితే, ఇవాళ ఎవరు బాగా ఆడితే వారిదే విజయం.మా తుది జట్టులో ఎలాంటి మార్పులు లేవు’’ అని భారత కెప్టెన్ రోహిత్ శర్మ వెల్లడించాడు.

15/11/2023 13:24(IST)

వాంఖడే పిచ్‌పై ఛేజింగ్‌లో పొంచి ఉన్న పెనుగండం..!

భారత కెప్టెన్‌ రోహిత్‌ శర్మ హోం గ్రౌండ్‌ అయిన వాంఖడే(Wankhede Stadium)లో టీమ్‌ఇండియా ప్రపంచకప్‌ (ODI World cup 2023) నాకౌట్‌ మ్యాచ్‌కు సిద్ధమైంది. వరుస విజయాలతో దూకుడు మీదున్న భారత్‌ జట్టు ఇక్కడ కూడా జైత్రయాత్రను కొనసాగించాలని భావిస్తోంది. తొలుత బ్యాటింగ్ చేసిన జట్టుకు ఇక్కడ అదనపు అధిక్యం లభిస్తుందని గణంకాలు చెబుతున్నాయి. ఇక్కడ మొత్తం 27 వన్డేలు జరగ్గా తొలుత బ్యాటింగ్‌ చేసిన జట్టు 14 సార్లు విజయం సాధించాయి. పూర్తి వార్త కోసం క్లిక్‌ చేయండి

15/11/2023 13:23(IST)

మూడు రికార్డుల ముంగిట విరాట్ కోహ్లీ.. అవన్నీ సచిన్‌వే!

టీమ్‌ఇండియా స్టార్ బ్యాటర్ విరాట్ కోహ్లీ (Virat Kohli) వన్డే ప్రపంచకప్‌లో మూడు రికార్డులకు చేరువగా ఉన్నాడు. న్యూజిలాండ్‌తో తొలి సెమీఫైనల్‌ మ్యాచ్‌ జరగనుంది. టోర్నీలో టాప్‌ స్కోరర్‌గా విరాట్ కోహ్లీ కొనసాగుతున్నాడు. ప్రస్తుతం 9 మ్యాచుల్లో 99 సగటుతో 594 పరుగులు సాధించాడు. ఇందులో రెండు శతకాలూ ఉన్నాయి. లీగ్ స్టేజ్‌లో కివీస్‌పై 95 పరుగులు సాధించి భారత విజయంలో కోహ్లీ కీలక పాత్ర పోషించాడు. అయితే, వరల్డ్‌ కప్‌ సెమీసుల్లో కోహ్లీ గొప్ప గణాంకాలు నమోదు చేయలేదు. కానీ, ఈసారి ఫామ్‌ను చూస్తుంటే మూడు రికార్డులు బద్దలు కావడం ఖాయంగా కనిపిస్తోంది. అవన్నీ క్రికెట్ దిగ్గజం సచిన్ తెందూల్కర్‌ పేరిట ఉన్నవే కావడం విశేషం. పూర్తి వార్త కోసం క్లిక్‌ చేయండి

15/11/2023 13:22(IST)

కివీస్‌తో సెమీస్‌.. టాస్‌ గెలిస్తే భారత్‌ ఏం చేయాలంటే?: సునీల్ గావస్కర్

వరల్డ్‌ కప్‌లో భారత్- న్యూజిలాండ్‌ (IND vs NZ) జట్ల మధ్య జరగబోయే సెమీఫైనల్‌పై సర్వత్రా ఆసక్తి నెలకొంది. ముంబయిలోని వాంఖడే మైదానం వేదికగా మ్యాచ్‌ కావడంతో టాస్‌ గెలిచిన జట్టు ఏం ఎంచుకుంటుంది? అనేదీ కీలకం కానుంది. అయితే, భారత క్రికెట్ దిగ్గజం సునీల్ గావస్కర్‌ మాత్రం టాస్‌కు పెద్దగా ప్రాధాన్యం లేదని వ్యాఖ్యానించడం గమనార్హం. భారత బౌలర్ల ఫామ్‌ను చూస్తుంటే టాస్‌ గెలిచి బౌలింగ్‌ ఎంచుకున్నా ప్రత్యర్థిని కట్టడి చేయగలరని పేర్కొన్నాడు. పూర్తి వార్త కోసం క్లిక్‌ చేయండి

15/11/2023 13:18(IST)

బెక్‌హామ్‌తో కలిసి సచిన్‌

ఇంగ్లాండ్‌ ఫుట్‌బాల్‌ దిగ్గజం బెక్‌హామ్‌తో కలిసి క్రికెట్‌ దిగ్గజం సచిన్‌ తెందూల్కర్‌ వాంఖడే మైదానంలో తళుక్కుమన్నాడు. యూనిసెఫ్‌ అంబాసిడర్లుగా వారిద్దరూ మైదానంలోకి వచ్చారు.

15/11/2023 13:16(IST)

భారత్‌-న్యూజిలాండ్‌ సెమీస్‌కు బెదిరింపులు.. వాంఖడే స్టేడియం వద్ద అలర్ట్‌

వన్డే ప్రపంచకప్‌ (ODI World cup 2023)లో భాగంగా భారత్‌, న్యూజిలాండ్‌ (IND vs NZ)మధ్య బుధవారం సెమీ ఫైనల్‌ (Semi Final) మ్యాచ్‌ జరగనుంది. ముంబయిలోని వాంఖడే మైదానం (Wankhede Stadium) వేదికగా మధ్యాహ్నం 2 గంటల నుంచి మ్యాచ్‌ ప్రారంభం కానుంది. అయితే ఈ మ్యాచ్‌కు బెదిరింపులు రావడం కలకలం రేపింది. దీంతో ముంబయి పోలీసులు (Mumbai Police) అప్రమత్తమయ్యారు. వాంఖడే స్టేడియం వద్ద భద్రతను కట్టుదిట్టం చేశారు. పూర్తి వార్త కోసం క్లిక్‌ చేయండి

15/11/2023 13:15(IST)

భారత్‌కు ఇది ఎనిమిదో సెమీస్‌.. అప్పుడేం జరిగింది?

వన్డే ప్రపంచకప్‌ చరిత్రలో భారత్‌కు ఇది ఎనిమిదో సెమీస్‌. ఇప్పటికే ఏడు సార్లు సెమీస్‌ మ్యాచ్‌లు ఆడిన మన జట్టు.. మూడు సార్లు గెలిచి, నాలుగు సార్లు ఓడింది. అప్పుడేం జరిగిందో చూద్దామా.. పూర్తి వార్త కోసం క్లిక్‌ చేయండి

15/11/2023 13:14(IST)

ఎవరు నేటి హీరోలు?

ఈ ప్రపంచకప్‌లో భారత్‌ తరఫున హీరోలు ఎందరో. కెప్టెన్‌ రోహిత్‌ శర్మ అద్భుత ఆరంభాలతో జట్టును ముందుండి నడిపిస్తున్నాడు. అతను 500 మార్కును దాటేశాడు. కోహ్లి ఒకప్పటి ఫామ్‌తో చెలరేగిపోతున్నాడు. టోర్నీ టాప్‌స్కోరర్‌ అతనే. కేఎల్‌ రాహుల్‌, శ్రేయస్‌ అయ్యర్‌ సైతం ఉపయుక్తమైన ఇన్నింగ్స్‌ ఆడారు. శుభ్‌మన్‌ కూడా రోహిత్‌తో కలిసి జట్టుకు మంచి ఆరంభాలనే ఇస్తున్నాడు. సూర్యకుమార్‌ ఒక మ్యాచ్‌లో కీలక ఇన్నింగ్స్‌ ఆడాడు. ఇక బౌలింగ్‌లో బుమ్రా డాట్‌బాల్స్‌తో ప్రత్యర్థి బ్యాటర్లను ఉక్కిరిబిక్కిరి చేస్తున్నాడు. సమయోచితంగా వికెట్లూ తీస్తున్నాడు. షమి అవకాశం అందుకున్నప్పటి నుంచి ఎలా రెచ్చిపోతున్నాడో తెలిసిందే. పూర్తి వార్త కోసం క్లిక్‌ చేయండి

15/11/2023 13:13(IST)

వదలొద్దు ఈసారి

సొంతగడ్డపై జరుగుతున్న ప్రపంచకప్‌లో ప్రత్యర్థులపై తిరుగులేని ఆధిపత్యం చలాయిస్తూ.. ఒక్క ఓటమీ లేకుండా నాకౌట్‌కు దూసుకొచ్చి అభిమానుల్లో అంచనాలను అమాంతం పెంచేసిన రోహిత్‌ సేన.. సెమీస్‌ సవాలుకు సిద్ధమైంది. ఏ హడావుడి లేకుండా ప్రశాంతంగా పని చేసుకుపోతూ, ప్రత్యర్థులకు షాకులిచ్చే న్యూజిలాండ్‌తో బుధవారం రోహిత్‌ సేన తలపడబోతోంది. టోర్నీలో జట్టు ప్రదర్శన, ఆటగాళ్ల వ్యక్తిగత ఫామ్‌, వాంఖడెలో రికార్డు.. ఇలా ఏ రకంగా చూసుకున్నా మ్యాచ్‌లో భారతే ఫేవరెట్‌. పూర్తి వార్త కోసం క్లిక్‌ చేయండి

IND vs NZ: ప్రపంచ కప్‌ ఫైనల్‌కు భారత్‌..

తాజా వార్తలు (Latest News)

ఒకే ట్రాక్‌పైకి నాలుగు రైళ్లు.. వైరల్‌ వీడియోపై రైల్వే శాఖ స్పష్టత

శ్రీవారి భక్తులకు మరింత సౌకర్యవంతంగా తితిదే సేవలు: అదనపు ఈవో వెంకయ్య చౌదరి

సీఎం నీతి ఆయోగ్ సమావేశాన్ని బహిష్కరించడం సరికాదు : కేంద్ర మంత్రి ప్రహ్లాద్‌ జోషి

ఎక్కడ గంజాయి పట్టుబడినా ధూల్‌పేట్‌లోనే మూలాలు: ఎక్సైజ్‌ ఎన్‌ఫోర్స్‌మెంట్‌ డైరెక్టర్‌

అక్కడ భర్తలకు భార్యలు పాకెట్‌ మనీ ఇస్తారట..

‘అలాంటి వ్యక్తి హోం మంత్రి.. నిజంగా విచిత్రమే’: షాపై శరద్‌ పవార్‌ ఘాటు వ్యాఖ్యలు

సుఖీభవ

చదువు