అప్పుల ఊబిలో ఉన్న పాక్​కు సౌదీ భారీ సాయం

తాజా వార్తలు

Updated : 28/10/2021 10:46 IST

అప్పుల ఊబిలో ఉన్న పాక్​కు సౌదీ భారీ సాయం

ఇస్లామాబాద్‌: పీకల్లోతు అప్పుల్లో కూరుకుపోయి ఆర్థిక సంక్షోభంలో కొట్టుమిట్టాడుతున్న పాకిస్థాన్​కు సౌదీ అరేబియా భారీ సాయం అందించనుంది. 4.2 బిలియన్ డాలర్లు సమకూర్చేందుకు అంగీకరించింది. ఈ వారం సౌదీలో పర్యటించిన పాక్ ప్రధాని ఇమ్రాన్‌ఖాన్‌.. ఆ దేశ యువరాజు మహ్మద్ బిన్​ సల్మాన్​తో చర్చలు జరిపిన మూడు రోజుల అనంతరం ఈ ప్రకటన వెలువడింది. సాయంలో భాగంగా పాకిస్థాన్ కేంద్ర బ్యాంకులో 3 బిలియన్ డాలర్లను సౌదీ డిపాజిట్ చేయనుంది. మరో 1.2 బిలియన్​ డాలర్లను ఈ ఏడాది రిఫైన్డ్ పెట్రోలియం ఉత్పత్తులకు ఫైనాన్స్ చేయనుంది.

సౌదీ సాయంతో ఆర్థిక సంక్షోభం లోంచి పాక్‌ కొద్దిమేర బయటపడే అవకాశాలున్నాయి. ఈ సాయానికి గానూ సౌదీ యువరాజుకు పాక్ ప్రధాని ఇమ్రాన్ ఖాన్ ధన్యవాదాలు తెలిపారు. ఆర్థిక ఇబ్బందులతో కష్టకాలంలో ఉన్న తమ దేశాన్ని ఆదుకుంటున్నందుకు కృతజ్ఞతలంటూ ట్వీట్​ చేశారు. సౌదీ ఆర్థిక సాయంతో పాకిస్థాన్ రూపాయి కోలుకుంటుందని ఇమ్రాన్ ఆర్థిక సలహాదారు శౌకత్​ తరిణ్​ ఆశాభావం వ్యక్తం చేశారు. సౌదీ ఆర్థిక ప్యాకేజీతో అంతర్జాతీయ ద్రవ్యనిధి కార్యక్రమానికి ఎలాంటి సంబంధం లేదని శౌకత్ స్పష్టం చేశారు.

గతంలో సంబంధాలు దెబ్బతినడంతో..

పాకిస్థాన్​కు 2018లోనే సౌదీ 3 బిలియన్ డాలర్ల ఆర్థిక సాయం అందించింది. విదేశీ మారక నిల్వల కోసం మరో 3 బిలియన్​ డాలర్ల చమురు సాయం అందిస్తామని అప్పట్లో ప్రకటించింది. అయితే ఆ తర్వాత ఇరు దేశాల మధ్య సంబంధాలు దెబ్బతినడంతో తీసుకున్న 3 బిలియన్ డాలర్లలో 2 బిలియన్​ డాలర్లను పాక్ తిరిగి వెనక్కి ఇచ్చేసింది. ఇప్పుడు మళ్లీ ఇమ్రాన్​ ఖాన్ మూడు రోజుల సౌదీ పర్యటన అనంతరం సంబంధాలు మెరుగుపడ్డాయి.



Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని