అజీర్ణానికి పసుపు కళ్లెం!

అజీర్ణ లక్షణాలు తగ్గటానికి పసుపులోని కర్‌క్యుమిన్‌ ఎంతో మేలు చేయగలదని తాజా అధ్యయనంలో బయటపడింది. కడుపులో ఆమ్లం తగ్గటానికి వాడే ఒమిప్రజోల్‌ మందుతో సమానంగా ఇది పని చేస్తుండటం  విశేషం. పసుపులోని కర్‌క్యుమిన్‌కు వాపును తగ్గించే గుణాలు, సూక్ష్మక్రిములను కట్టడి చేసే సామర్థ్యం ఉన్నట్టు ఇప్పటికే తెలుసు. అందుకే గాయాలు తగ్గటానికి దీన్ని వాడుతుంటారు. కొన్నిచోట్ల జీర్ణక్రియను పెంచటానికీ వాడుతుంటారు. అయితే సంప్రదాయ మందులతో పోలిస్తే ఇదెంత సమర్థంగా పనిచేస్తుందనేది తెలియదు. దీన్ని గుర్తించటానికే థాయిలాండ్‌ పరిశోధకులు ఓ అధ్యయనాన్ని నిర్వహించారు. అజీర్ణంతో బాధపడుతున్నవారిలో కొందరికి కర్‌క్యుమిన్‌, మరికొందరికి ఒమిప్రజోల్‌ మాత్రలు.. ఇంకొందరికి రెండూ కలిపి ఇచ్చి పరిశీలించారు. అందరిలోనూ నొప్పి, కడుపుబ్బరం వంటి లక్షణాలు దాదాపు సమానంగా తగ్గటం గమనార్హం.