పండ్ల రసాలు మంచివే కానీ..

పండ్లు, కూరగాయల్లో విటమిన్లు, ఖనిజాలు బోలెడన్ని ఉంటాయి. వీటి రసాలను తాగటం ఇటీవల ఎక్కువైంది కూడా. కూల్‌డ్రింకుల వంటి వాటితో పోలిస్తే ఇవి మంచివే కావొచ్చు. కానీ రసాలను తీయటం వల్ల కీలకమైన పీచును కోల్పోతున్నామనే సంగతి గుర్తించటం లేదు. ఆరోగ్యానికి పీచు ఎంతో అవసరం. కొన్ని పండ్లు, కూరగాయల్లో పీచు మధ్యలో పాలీఫెనాల్స్‌, యాంటీఆక్సిడెంట్లు దాగుంటాయి. కాబట్టి పీచును తీసేస్తే ఇలాంటి పోషకాలనూ కోల్పోయినట్టే. అంతేకాదు, పీచు కడుపు నిండిన భావన కూడా కలిగిస్తుంది. అందువల్ల త్వరగా ఆకలేయదు. జీర్ణక్రియ సాఫీగా సాగటానికి, కొలెస్ట్రాల్‌ తగ్గటానికి, రక్తంలో గ్లూకోజు స్థిరంగా ఉండటానికీ పీచు తోడ్పడుతుంది. పండ్లలోని చక్కెర పీచుతో కలిసి ఉంటుంది. శరీరం పీచును త్వరగా జీర్ణం చేసుకోలేదు కాబట్టి సహజ చక్కెరలు అంత త్వరగా రక్తంలో కలవవు. పీచును తొలగిస్తే సహజ చక్కెరల పనితీరూ మారుతుంది. ఇవి త్వరగా రక్తంలో కలుస్తాయి. అంతే త్వరగా వీటి మోతాదులు పడిపోతాయి.