Diabetes : మధుమేహానికి శాకాహార కళ్లెం!

మధుమేహం ఎంత వేగంగా విస్తరిస్తున్నప్పటికీ ఆరోగ్యకరమైన జీవనశైలితో నివారించుకునే మార్గం లేకపోలేదు. మెడ్‌యునీ వియెన్సాస్‌ సెంటర్‌ తాజా అధ్యయనం దీన్ని మరోసారి రుజువు చేసింది. తాజా పండ్లు, కూరగాయలు, పొట్టుతీయని పదార్థాలతో కూడిన శాకాహారంతో మధుమేహం ముప్పు 24% వరకు తగ్గుతున్నట్టు తేల్చింది. శాకాహారం మూలంగా జీవక్రియ, కాలేయం, కిడ్నీ పనితీరు మెరుగవుతున్నట్టు.. ఇవి మధుమేహం ముప్పు తగ్గటానికి తోడ్పడుతున్నట్టు పరిశోధకులు గుర్తించారు. ఊబకాయం వంటి మధుమేహ ముప్పు కారకాలు, జన్యుపరంగా మధుమేహం వచ్చే అవకాశం ఉన్నా కూడా శాకాహారం సానుకూల ప్రభావాన్ని చూపిస్తుండటం విశేషం. అదే మిఠాయిలు, పొట్టు తీసిన ధాన్యాలు, తీపి పానీయాలు ఎక్కువగా తీసుకుంటే మధుమేహం ముప్పు పెరుగుతోందనీ తేలింది. శాకాహారుల్లో రక్తంలో కొవ్వులు (ట్రైగ్లిజరైడ్లు), గ్లూకోజు (హెచ్‌బీఏ1సీ), వాపు ప్రక్రియ సూచికలు, ఇన్సులిన్‌ వంటి వృద్ధి కారకాల మోతాదులు తక్కువగా ఉంటున్నాయనీ, ఫలితంగా మధుమేహం ముప్పూ తగ్గుతోందని పరిశోధకులు చెబుతున్నారు. మాంసాహారం, అధిక తీపి పదార్థాలు తగ్గించినా ఇలాంటి ఫలితమే కనిపిస్తుండటం గమనార్హం.