కాఫీ బలం!

వృద్ధాప్యంలో బలంగా ఉండాలనుకుంటే మధ్యవయసులో కాఫీ, టీ కాస్త ఎక్కువగా తాగి చూడండి. వీటి రూపంలో కెఫీన్‌ ఎక్కువగా తీసుకున్నవారికి మలి వయసులో శారీరక బలహీనత తక్కువగా ఉంటున్నట్టు నేషనల్‌ యూనివర్సిటీ ఆఫ్‌ సింగపూర్‌ అధ్యయనంలో తేలింది మరి. వృద్ధాప్యంలో సహజంగానే బలం, శారీరక, మానసిక సామర్థ్యం తగ్గుతాయి. దీంతో ఇతరుల మీద ఆధాపడాల్సి వస్తుంటుంది. ఇలాంటి పరిస్థితిని తగ్గించుకోవటానికి కెఫీన్‌ తోడ్పడుతున్నట్టు పరిశోధకులు గుర్తించారు. సగటున 53 ఏళ్ల వయసుగలవారిని ఎంచుకొని దాదాపు 20 ఏళ్ల పాటు పరిశీలించారు. అసలే కాఫీ తాగనివారితో పోలిస్తే- రోజుకు నాలుగు కప్పుల కాఫీ తాగినవారికి వృద్ధాప్యంలో దుర్బలత్వం వచ్చే అవకాశం తక్కువగా ఉంటోందని కనుగొన్నారు. రోజూ టీ తాగేవారిలోనూ ఇలాంటి ఫలితమే కనిపించింది. దీనికి కారణం కెఫీనేనని భావిస్తున్నారు. అలాగని కాఫీ, టీలు మరీ ఎక్కువగా తాగితే ప్రమాదమే. మితిమీరకుండా చూసుకుంటేనే మంచి ఫలితం కనిపిస్తుంది.