మోగని గంటలు.... గుహలో వింతలు!!

మోగని గంటలు.... గుహలో వింతలు!!

అనగనగా ఓ కొలనుంది... అందులో ఒక గుహ... ఆ గుహలో ఉందో వింత... ఇంతకీ ఏంటది?
ఆ గుహలో అడుగుపెట్టగానే బోలెడు గంటలు మనకు కనిపిస్తాయి. అవి అలా ఇలా కాదు మనుషులంత పెద్దగా ఉండే గంటలు. పైగా ఒకటి కాదు రెండు కాదు వందలాదిగా ఉంటాయి. మరి త్వరగా ఆ వివరాలేంటో చదివేద్దామా!

* గంటలనగానే గుళ్లొనో, బళ్లొనో ఉండే గంటలనుకోకండి! ఇవి నిజమైన గంటలు కావు. కానీ గంటల ఆకారాల్లో ఏర్పడ్డ నిర్మాణాలు. గంటల్ని పోలి ఉన్నాయి కాబట్టి వీటిని ‘హెల్స్‌ బెల్స్‌’ (నరకపు గంటలు) అనే పేరుతో పిలుస్తారు.
* పైనుంచి వేలాడుతూ కనిపించే వీటి స్వరూపాన్ని బట్టి ఏనుగు పాదం, బూర, షవర్‌ హెడ్స్‌ అంటూ రకరకాల పేర్లు కూడా ఉన్నాయి.
* చూడాలంటే విమానం ఎక్కి మెక్సికోలోని యుకటనాకు వెళ్లాల్సిందే.
* ఇక్కడి కెనోట్‌ జాపోట్‌ అనే చిన్న కొలనులో ఉంటుందీ గుహ. ఉపరితలం నుంచి వంద అడుగుల లోతులో నీటితో నిండి ఉంటుంది. పైకప్పు నుంచి రకరకాల పరిమాణాల్లో కిందికి వేేళాడుతున్న గంటను పోలిన ఆ ఆకారాలే ఈ గుహ అసలు ప్రత్యేకత.

* ఇవి ఎందుకు ఏర్పడ్డాయో కచ్చితంగా తెలియకపోయినా మంచు యుగం నుంచి ఒకరకమైన ప్రత్యేక పదార్థం పొరలు పొరలుగా రూపొందడం వల్ల ఈ ఆకారాలు తయారై ఉంటాయని భావిస్తున్నారు.
* ఈ గుహలోకి వెళ్లడం అంత సులువేమీ కాదు. ఎందుకంటే గుహ దారి సన్నగా ఇరుగ్గా ఉంటుందిట. దీన్ని అధిగమించాలంటే డైవింగ్‌లో అనుభవం ఉండాలి మరి.
* ఇక్కడికి వందలాదిమంది సాహసికులు వచ్చి తమ సరదా తీర్చుకుంటారు.