మిలటరీ లేని దేశం!

సోలమన్‌ ఐలాండ్స్‌
మిలటరీ లేని దేశం!  

పసిఫిక్‌ మహా సముద్రంలో దక్షిణాన ఉన్న ద్వీపదేశం సోమన్‌ ఐల్యాండ్స్‌. ఆస్ట్రేలియాకు ఈశాన్యంవైపు ఉండే దీవులివి.  పవునా న్యూగినియా, వనాటూలు పొరుగు దేశాలుగా ఉన్నాయి.

దీనిలో దాదాపుగా వెయ్యి ద్వీపాలున్నాయి. వాటిలో ముఖ్యమైనవి మాత్రం ఆరు. అవి చోయ్‌సల్‌, గౌడాల్‌కెనాల్‌, మలైటా, మకైరా, న్యూజార్జియా, శాంటాఐస్‌బల్‌లు.
*  ఇది 1978లో గ్రేట్‌ బ్రిటన్‌ నుంచి స్వతంత్రం పొందింది.
*  ఇక్కడ 90శాతం దట్టమైన అడవులే. ఎత్తయిన పర్వతాలు, లోయలు, పగడపుదిబ్బలకు ఈ దేశం పెట్టిందిపేరు.
*  ఇది ఉష్ణమండల ప్రాంతం. డిసెంబర్‌ నుంచి మార్చి వరకు వేడిగా ఉంటుంది. ఏప్రిల్‌ నుంచి నవంబరు వరకు చల్లగా ఉంటుంది.

*  ఈ దేశానికి 5,313 కిలోమీటర్ల తీర రేఖ ఉంది.
*  వీరి అధికారిక భాష ఆంగ్లమే అయినా దాన్ని మాట్లాడేవారు దాదాపుగా ఒకటి నుంచి రెండు శాతం మంది మాత్రమే. ఇక్కడ 120 వరకు స్థానిక భాషలున్నాయి. వాటిల్లోనే వీరు ఎక్కువగా సంభాషణలు జరుపుతారు.
*  దాదాపు 30,000సంవత్సరాల క్రితం పపువా న్యూగినియా నుంచి కొందరు వచ్చి తొలిసారిగా ఇక్కడ స్థిరపడ్డారని చెబుతారు.

 *  దీని రాజధాని హోనియారా ఇక్కడి గౌడాల్‌కెనాల్‌ ద్వీపంలో ఉంది. ఈ దేశంలో అత్యంత ఎత్తయిన చోటుకూడా ఈ ద్వీపంలోనే ఉంది. దాన్ని ఉల్ట్రాపీక్‌ అని పిలుస్తారు. ఇది సముద్రమట్టానికి 2300మీటర్ల ఎత్తులో ఉంది.
*  బంగారం, సీసం, జింకు, నికెల్‌లు ఇక్కడ ఎక్కువగా దొరికే ఖనిజాలు.

*  చైనా, థాయిలాండ్‌, జపాన్‌, న్యూజీలాండ్‌, మలేషియా, సింగపూర్‌, ఆస్ట్రేలియాలతో ఎక్కువగా వ్యాపార సంబంధాలున్నాయి.
*  కొకొవా, కొబ్బరి, వరి, బంగాళాదుంపలు, పామ్‌తోటల్ని ఎక్కువగా సాగు చేస్తారు. పశువులు, పందుల్ని పెంచుతారు.
*  కలప, చేపలు, పామాయిల్‌లను ఎక్కువగా ఎగుమతి చేస్తారు.

*  ప్రపంచంలోనే అతి పెద్ద ఉప్పు నీటి మడుగుల్లో ఒకటైన మరోవో ఇక్కడి న్యూజార్జియా దీవిలో ఉంది. 700చదరపు కిలోమీటర్లలో విస్తరించి ఉంది. పగడపు దిబ్బలుండటంతో దీన్ని సంరక్షిత ప్రాంతంగా చేశారు.
*  పగడపు దిబ్బలతో ఏర్పడ్డ ప్రపంచంలోనే అతిపెద్ద దీవి ఈస్ట్‌ రెన్నెల్స్‌ ఇక్కడే ఉంది.

*  నివాసాలకోసం ఇక్కడ కృత్రిమంగా ద్వీపాలనూ ఏర్పాటు చేసుకుంటారు. రాళ్లను ఒకదగ్గరకు చేర్చికదలకుండా చేసి వాటిపై నివాసాలు ఏర్పరుచుకుంటారు.
*  చదువు ఎవరికీ నిర్బంధం కాదు.