ముంపు ప్రాంతాల ప్రజల్ని పునరావాస కేంద్రాలకు తరలించాం

మంత్రులు అనగాని, అనిత

ఈనాడు, అమరావతి: మొంథా తుపాను నేపథ్యంలో సముద్ర తీరం వెంబడి ప్రభావిత గ్రామాల ప్రజల్ని ఇప్పటికే పునరావాస కేంద్రాలకు తరలించామని రెవెన్యూ మంత్రి అనగాని సత్యప్రసాద్‌ వెల్లడించారు. సముద్రంలో వేటకు వెళ్లిన మత్స్యకారులు సురక్షితంగా బయటకొచ్చారని తెలిపారు. రాష్ట్ర సచివాలయంలో హోంమంత్రి అనితతో కలిసి సోమవారం ఆయన విలేకరులతో మాట్లాడారు. ‘‘అధికార యంత్రాంగం అప్రమత్తంగా ఉంది. అవాంఛనీయ ఘటనలు జరగకుండా సీఎం చంద్రబాబు, మంత్రి లోకేశ్‌ ఎప్పటికప్పుడు సమీక్షలు నిర్వహిస్తున్నారు’’ అని సత్యప్రసాద్‌ తెలిపారు. సహాయక చర్యల్లో పాల్గొనేందుకు ఇప్పటికే 13 ఎన్డీఆర్‌ఎఫ్‌ బృందాలు ఉన్నాయని...మరో మూడింటిని తెప్పిస్తున్నామని  అనిత వివరించారు. ‘‘తీర ప్రాంతాల ప్రజలు తుపాను పునరావాస కేంద్రాలకు వెళ్లి అధికార యంత్రాంగానికి సహకరించాలి. ఇప్పటికే పౌర సరఫరాల శాఖ ద్వారా అక్కడికి నిత్యావసర సరకులు సరఫరా చేస్తున్నాం. కలెక్టరు మొదలు వీఆర్వో వరకు అందరూ అప్రమత్తంగా ఉన్నారు’’ అని అనిత పేర్కొన్నారు.