తాగునీటికి ఇబ్బందుల్లేకుండా చూడాలి

మున్సిపల్‌ కమిషనర్లకు మంత్రి నారాయణ ఆదేశం 

ఈనాడు, అమరావతి: తుపాను నేపథ్యంలో తాగునీటి సరఫరాకు ఇబ్బందుల్లేకుండా ప్రత్యామ్నాయ ఏర్పాట్లు చేయాలని పుర, నగరపాలక సంస్థలు, నగర పంచాయతీల కమిషనర్లు, ఇంజినీర్లను పురపాలక శాఖ మంత్రి నారాయణ ఆదేశించారు. కమిషనర్లతో మంత్రి సోమవారం టెలికాన్ఫరెన్స్‌ నిర్వహించారు. ‘అన్ని మున్సిపాల్టీలు, కార్పొరేషన్లలో కాల్‌ సెంటర్లు 24 గంటలూ పనిచేసేలా చూడాలి. కంట్రోల్‌ రూంల ద్వారా ప్రజలకు నిరంతరం సమాచారం అందించాలి. రోడ్లపై చెట్లు కూలితే, వెంటనే తొలగించేలా యంత్రాలు అందుబాటులో ఉంచుకోవాలి. లోతట్టు ప్రాంతాల్లో నీరు  నిలవకుండా ఎప్పటికప్పుడు తొలగించాల’ని ఆదేశించారు. ఆ శాఖ ముఖ్య కార్యదర్శి సురేశ్‌కుమార్, పురపాలక శాఖ కమిషనర్‌ సంపత్‌కుమార్‌ తదితరులు పాల్గొన్నారు.