సార్వత్రిక విద్యా పీఠంలో 93 వేల మందికి ప్రవేశాలు కల్పించాలి: పాఠశాల విద్యాశాఖ

ఈనాడు, అమరావతి: రాష్ట్రంలో చదువు మధ్యలో మానేసిన విద్యార్థులకు సార్వత్రిక విద్యా పీఠంలో ప్రవేశాలు కల్పించి, వారితో ఉన్నత చదువులు పూర్తి చేయించాలని పాఠశాల విద్యాశాఖ తాజాగా నిర్ణయించింది. పదో తరగతి ఉత్తీర్ణత తర్వాత ఇంటర్మీడియట్‌లో చేరని వారు, పదిలో అనుత్తీర్ణులైన వారికి సార్వత్రిక విద్యా పీఠంలో ప్రవేశాలు కల్పించాలని సూచించింది. జిల్లాల వారీగా క్షేత్రస్థాయి అధికారులకు పాఠశాల విద్యాశాఖ లక్ష్యాలను నిర్దేశించింది. సార్వత్రిక విద్యా పీఠం ప్రవేశాలపై విస్తృతంగా ప్రచారం నిర్వహించాలని, అభ్యర్థులకు అవగాహన కల్పించాలని సూచించింది. సార్వత్రిక విద్యా పీఠం ప్రవేశాలు పెరగడంతో పాటు చదువు మధ్యలో మానేసిన వారు ఉన్నత చదువులు చదివేందుకు అవకాశం ఉంటుందనే ఉద్దేశంతో ఈ కార్యక్రమాన్ని చేపట్టింది. పదో తరగతిలో ప్రవేశాలు పొందాల్సిన వారు 28,287 మంది ఉండగా, ఇంటర్మీడియట్‌లో చేరాల్సిన వారు 65,271 మంది ఉన్నారు. మొత్తం 93,558 మందికి ఈ నెల 31లోపు సార్వత్రిక విద్యా పీఠంలో ప్రవేశాలు కల్పించాలని సూచించింది.