సీనియర్‌ సైంటిఫిక్‌ అధికారిపై విచారణకు ప్రభుత్వం ఆదేశం

ఈనాడు, అమరావతి: ఔషధ నియంత్రణ విభాగం రాష్ట్ర లేబొరేటరీలో సీనియర్‌ సైంటిఫిక్‌ అధికారిగా పనిచేస్తున్న కె.యాదగిరిపై ప్రభుత్వం విచారణకు ఆదేశించింది. విచారణ అధికారులుగా డ్రగ్‌ కంట్రోల్‌ ప్రధాన కార్యాలయ జేడీని, మరో సీనియర్‌ సైంటిఫిక్‌ అధికారిని నియమించింది. విధి నిర్వహణలో నిర్లక్ష్యంగా వ్యవహరించారన్న ఆరోపణలను యాదగిరి ఎదుర్కొంటున్నారు. 2021 అక్టోబరు 20న ఒంగోలుకు చెందిన కె.శ్రీనివాస్, ఇతర ఫార్మసిస్టుల నుంచి అందిన ఫిర్యాదుల మేరకు ప్రభుత్వం శాఖాపరమైన విచారణకు ఆదేశించింది. పదోన్నతికి విచారణ అడ్డంకిగా మారుతోందని యాదగిరి న్యాయస్థానాన్ని ఆశ్రయించడంతో నిర్దేశిత సమయంలో విచారణ పూర్తిచేసి నివేదిక ఇవ్వాలని హైకోర్టు ప్రభుత్వాన్ని ఆదేశించింది. దీంతో కేసు విచారణ పూర్తిచేసి నివేదిక ఇచ్చేందుకు విచారణ అధికారులను నియమిస్తూ వైద్యారోగ్యశాఖ కార్యదర్శి సౌరభ్‌ గౌర్‌ మంగళవారం ఉత్తర్వులు జారీచేశారు.