మొంథా తుపాన్‌ను జాతీయ విపత్తుగా ప్రకటించాలి

కాంగ్రెస్‌ పార్టీ రాష్ట్ర అధ్యక్షురాలు షర్మిల డిమాండ్‌

ఈనాడు, అమరావతి: కేంద్ర ప్రభుత్వం మొంథా తుపాన్‌ను జాతీయ విపత్తుగా ప్రకటించి, తీవ్రంగా నష్టపోయిన రైతులు, ప్రజలను ఆదుకోవాలని కాంగ్రెస్‌ పార్టీ రాష్ట్ర అధ్యక్షురాలు షర్మిల డిమాండ్‌ చేశారు. నష్టాలు అంచనా వేయడానికి ప్రత్యేక బృందాలను వెంటనే రాష్ట్రానికి పంపాలని అన్నారు. అంచనా నివేదికలొచ్చేలోపు రాష్ట్రానికి తక్షణ సాయం కింద రూ.10 వేల కోట్లు ప్రధాని మోదీ ప్రకటించాలని గురువారం ఒక ప్రకటనలో షర్మిల విజ్ఞప్తి చేశారు. ‘ ప్రధాని మోదీ...ఆంధ్రప్రదేశ్‌పై సవతి ప్రేమ చూపిస్తున్నారు. ఆపద సమయంలో మొహం చాటేసి మరోసారి తీవ్ర అన్యాయం చేస్తున్నారు. రాష్ట్రంలో 20 లక్షల ఎకరాలకుపైగా పంటలు నీట మునిగాయి. ఖరీఫ్‌లో సాగైన పంటల్లో 30% పనికి రాకుండా పోయాయి. ఇది రూ.20 వేల కోట్లకుపైగానే జరిగిన అపార నష్టం. కేవలం 2.88 లక్షల ఎకరాల్లోనే నష్టం జరిగినట్లు తక్కువ చేసి చూపడం రాష్ట్ర ప్రభుత్వానికి భావ్యం కాదు. సీఎం చంద్రబాబు కేంద్రం నుంచి పెద్ద మొత్తంలో ఆర్థిక సహాయం తీసుకురావాలి. తుపాను కారణంగా నష్టపోయిన ప్రతి కుటుంబాన్ని ఆదుకోవాలి’ అని షర్మిల డిమాండ్‌ చేశారు.