రాజకీయ దురుద్దేశాలతోనే సునీత పిటిషన్‌

అవినాశ్‌రెడ్డి, భాస్కర్‌రెడ్డి, శివశంకర్‌రెడ్డిల కౌంటరు దాఖలు

ఈనాడు, హైదరాబాద్‌: వివేకా హత్యకేసులో రాజకీయ దురుద్దేశాలతోనే తదుపరి దర్యాప్తు కోరుతూ సునీతారెడ్డి పిటిషన్‌ దాఖలు చేశారంటూ వైఎస్‌ అవినాశ్‌రెడ్డి, భాస్కర్‌రెడ్డి, శివశంకర్‌రెడ్డిలు గురువారం సీబీఐ కోర్టుకు నివేదించారు. ఏపీలో మారిన రాజకీయ పరిస్థితులు, ప్రస్తుతం అధికారంలో ఉన్నవారితో సునీతకు ఉన్న పొత్తు నేపథ్యంలో అవినాశ్‌రెడ్డి ప్రతిష్ఠను దెబ్బతీయడానికే ఈ పిటిషన్‌ వేశారన్నారు. తదుపరి దర్యాప్తునకు ఆదేశించాలంటూ సునీత వేసిన పిటిషన్‌కు వీరు కౌంటరు దాఖలు చేశారు. దర్యాప్తు పర్యవేక్షక పాత్రను సునీత పోషిస్తున్నట్లు తెలుస్తోందని వారు కౌంటరులో పేర్కొన్నారు. సునీత పిటిషన్‌పై సీబీఐ ప్రధానకోర్టు న్యాయమూర్తి టి.రఘురాం గురువారం విచారణ చేపట్టారు. పిటిషనర్‌ తరఫు న్యాయవాది ఎస్‌.గౌతం వాదనలు వినిపిస్తూ.. 4వ నిందితుడైన యాదాటి సునీల్‌యాదవ్‌ ఇంకా కౌంటరు దాఖలు చేయలేదన్నారు. న్యాయమూర్తి విచారణను శుక్రవారానికి వాయిదా వేస్తూ.. కౌంటరు వేయాలని సునీల్‌యాదవ్‌ను ఆదేశించారు.