3 జిల్లాల్లోని 37 మండలాల్లో కరవు

ఈనాడు-అమరావతి: ఖరీఫ్‌ పంటకాలంలో 3 జిల్లాల పరిధిలోని 37 మండలాలను కరవు ప్రభావితమైనవిగా ప్రభుత్వం శుక్రవారం ప్రకటించింది. శ్రీసత్యసాయి జిల్లాలో మొత్తం 25 కరవు మండలాలను ప్రకటించగా వాటిలో 12 తీవ్ర, 13 మధ్యస్థ కరవు ప్రాంతాలుగా పేర్కొన్నారు. అన్నమయ్య జిల్లాలో 9, ప్రకాశం జిల్లాలో 3 మండలాల్ని మధ్యస్థ కరవు మండలాలుగా ప్రకటించారు. అన్నమయ్య జిల్లాలో గాలివీడు, లక్కిరెడ్డిపల్లి, రామాపురం, వీరబల్లె, వాల్మీకిపురం, కురబలకోట, మదనపల్లె, నిమ్మనపల్లె, రామసముద్రం మండలాల్లో మధ్యస్థ కరవుగా పేర్కొన్నారు. శ్రీసత్యసాయి జిల్లాలోని అగలి, ఆమడగూరు, గాండ్లపెంట, హిందూపురం, మడకశిర, ముదిగుబ్బ, ఎన్‌పీకుంట, ఓడీ చెరువు, రామగిరి, రోళ్ల, తలుపుల, తనకల్‌ మండలాల్లో తీవ్ర కరవుగా ప్రకటించారు. అమరాపురం, బత్తపల్లి, బుక్కపట్నం, ధర్మవరం, గుదిబండ, కదిరి, కనగానిపల్లి, కొత్తచెరువు, లేపాక్షి, నల్లచెరువు, నల్లమడ, పుట్టపర్తి, సోమందేపల్లి మండలాల్లో మధ్యస్థ కరవుగా గుర్తించారు. ప్రకాశం జిల్లా కొండపి, జరుగుమల్లి, పొన్నలూరు మండలాల్లో మధ్యస్థ కరవుగా పేర్కొన్నారు.