Android ChromeOS Merger: పీసీ మార్కెట్‌పై గూగుల్‌ గురి.. మైక్రోసాఫ్ట్, యాపిల్‌తో పోటీకి మరోసారి రెడీ

Android ChromeOS Merger | ఇంటర్నెట్‌ డెస్క్‌: మొబైల్‌ అనగానే అందరికీ గుర్తొచ్చేది ఆండ్రాయిడ్‌ స్మార్ట్‌ఫోన్‌. అంతగా ప్రజాదరణ పొందిన ఈ ఆపరేటింగ్‌ సిస్టమ్‌ కేవలం చిన్న డివైజులకే పరిమితం అయ్యింది. పర్సనల్‌ కంప్యూటర్ల విషయానికొచ్చేసరికి ఇప్పటికీ మైక్రోసాఫ్ట్‌ విండోస్‌, యాపిల్‌ మ్యాక్‌ఓఎస్‌దే హవా. వాటికి పోటీగా గూగుల్‌ సంస్థ క్రోమ్‌ ఓఎస్‌ తీసుకొచ్చి ఓ ప్రయత్నం చేసినప్పటికీ.. పెద్దగా ప్రభావం చూపలేకపోయింది. ఇప్పుడు పీసీ మార్కెట్‌పై గూగుల్‌ మరోసారి దృష్టి సారించింది. పీసీల కోసం ఆండ్రాయిడ్‌ ఓఎస్‌ను సిద్ధం చేస్తోంది. ఇందుకోసం ఆండ్రాయిడ్‌, క్రోమ్‌ఓఎస్‌ను విలీనం చేయనుంది. హవాయిలో జరిగిన స్నాప్‌డ్రాగన్‌ సమ్మిట్‌లో గూగుల్‌ ప్రతినిధి ఈ విషయాన్ని ధ్రువీకరించారు.

ఆండ్రాయిడ్‌, క్రోమ్‌ఓఎస్‌ను మెర్జ్‌ చేస్తారంటూ ఎప్పటి నుంచో రూమర్స్‌ వినిపిస్తున్నాయి. స్నాప్‌డ్రాగన్‌ ఈవెంట్‌కు హాజరైన గూగుల్‌ ప్రతినిధి రిక్‌ ఓస్టెర్లో దీన్ని ధ్రువీకరించారు. పీసీల కోసం స్మార్ట్‌ఫోన్‌ల కోసం రెండు వేర్వేరు ఆపరేటింగ్‌ సిస్టమ్‌లను ప్రస్తుతం అందిస్తున్నామని, ఈ రెండింటినీ విలీనం చేయబోతున్నట్లు వెల్లడించారు. పీసీలకూ జెమినీ, ఆండ్రాయడ్‌ ఏఐ ఫీచర్లను జోడించబోతున్నట్లు తెలిపారు. కంప్యూటింగ్‌ కేటగిరీలో ప్రతి ఒక్కరికీ ఆండ్రాయిడ్‌ సేవలందించేందుకు ఇదో మార్గంగా పేర్కొన్నారు. దీనిపై క్వాల్‌కామ్‌ సీఈఓ క్రిస్టియానో అమన్‌ స్పందిస్తూ.. ఈ సాఫ్ట్‌వేర్‌ వెర్షన్‌ను తాను చూశానని, అద్భుతంగా ఉందంటూ కొనియాడారు. దీనికోసం తాను ఆసక్తిగా ఎదురుచూస్తున్నట్లు చెప్పారు. 

• లాభాల్లో ‘బంగారు’ కొండ.. నిఫ్టీని మించి ప్రతిఫలం పంచిన పసిడి

పర్సనల్‌ కంప్యూటర్‌ మార్కెట్‌లోనూ సత్తా చాటేందుకు క్రోమ్‌ఓఎస్‌ను గూగుల్ తీసుకొచ్చింది. ఎంట్రీలెవల్‌ కంప్యూటర్ల కోసం సులువుగా, వేగంగా సేవలందించడంతోపాటు సెక్యూరిటీ పరంగానూ మెరుగైన సేవలందించేందుకు దీనిద్వారా ఓ ప్రయత్నం చేసింది. ఈ ఓఎస్‌తో పనిచేసే క్రోమ్‌బుక్స్‌లో ఆండ్రాయిడ్‌ యాప్స్‌ను వినియోగించే సదుపాయాన్నీ తీసుకొచ్చింది. ఇన్ని చేసినా పీసీ మార్కెట్‌లో క్రోమ్‌ ఓఎస్‌ వాటా కేవలం 7.3 శాతం దగ్గరే ఆగిపోయింది. విండోస్‌ మాత్రం 79.8 శాతం మార్కెట్‌ వాటాతో అగ్రస్థానంలో కొనసాగుతోంది. ఈ నేపథ్యంలో మరోసారి పీసీ మార్కెట్‌పై గూగుల్‌ గురిపెట్టింది. మరోవైపు పర్సనల్‌ కంప్యూటర్లకు తన చిప్‌సెట్‌లను విక్రయించడం ద్వారా తన మార్కెట్‌ విస్తరించాలని క్వాల్‌కామ్‌ భావిస్తోంది.