Arattai messaging app: ట్రెండింగ్‌లో స్వదేశీ యాప్‌ ‘అరట్టై’.. వాట్సప్‌నకు పోటీ ఇస్తుందా?

Arattai messaging app | ఇంటర్నెట్‌ డెస్క్: వాట్సప్‌కి ప్రత్యామ్నాయంగా చెన్నైకి చెందిన జోహో కార్పొరేషన్‌ రూపొందిన మెసేజింగ్‌ యాప్‌ ‘అరట్టై’ ఇప్పుడు ట్రెండవుతోంది. ఈ యాప్‌ ప్రస్తుతం యాపిల్‌ యాప్‌ స్టోర్‌లో సోషల్‌ నెట్‌వర్కింగ్‌ విభాగంలో నంబర్‌-1 స్థానంలో నిలిచింది. కేంద్ర విద్యాశాఖ మంత్రి ధర్మేంద్ర ప్రదాన్‌ తాజాగా ఈ యాప్‌ను ప్రోత్సహిస్తూ ప్రజలు వాడాలని పిలుపునిచ్చారు. దీంతో ప్రస్తుతం ఈ యాప్‌ వార్తల్లోకెక్కింది.

తమిళంలో ‘అరట్టై’ అంటే ‘మాట్లాడుకోవడం’ అని అర్థం. టెక్స్ట్‌ మెసేజులు, ఫొటోలు, వీడియోలు, డాక్యుమెంట్లు పంపడం, వాయిస్‌/వీడియో కాల్స్‌ చేయడం, స్టోరీస్‌, ఛానల్స్‌ క్రియేట్‌ చేయడం.. ఇలా పర్సనల్‌ నుంచి ప్రొఫెషనల్‌ వాడకానికి ఉపయోగపడేలా ఈ యాప్‌ను డిజైన్‌ చేశారు. దేశీయ ఉత్పత్తులు, సేవలను వినియోగించాలన్న ప్రధాని మోదీ పిలుపు మేరకు కేంద్రమంత్రి అశ్వినీ వైష్ణవ్‌ తాజాగా తాను జోహోకు మారుతున్నట్లు వెల్లడించారు. మైక్రోసాఫ్ట్‌ పవర్‌పాయింట్ బదులు జోహోతోనే తాజా కేబినెట్‌ ప్రంజెంటేషన్‌ తయారు చేసినట్లు వెల్లడించారు. ఇదే తరహాలో ‘అరట్టై’ని వాడాలంటూ ధర్మేంద్ర ప్రదాన్‌ పిలుపునిచ్చారు.

• ‘సిరి’లో కీలక మార్పులకు యాపిల్‌ ChatGPT తరహా యాప్‌!

ప్రస్తుతం అరట్టై యాప్‌లో కాల్స్‌కు మాత్రమే ఎండ్‌-టు-ఎండ్‌ ఎన్‌క్రిప్షన్‌ ఉంది. మెసేజులకు ఆ సదుపాయం లేదు. అంటే మీ మెసేజులను థర్డ్‌ పార్టీ వ్యక్తులు కూడా చూడొచ్చన్నమాట. మున్ముందు దీన్ని తీసుకొస్తారో లేదో చూడాలి. ఇది ప్రైవసీకి అధిక ప్రాధాన్యం ఇచ్చే యూజర్లకు ఆందోళన కలిగించే అంశం. మరోవైపు వాట్సప్‌ లాంటి గ్లోబల్‌ దిగ్గజానికి దీటుగా నిలవాలంటే ఈ లోటు భర్తీ చేయాల్సిందేనని నిపుణులు చెబుతున్నారు. ప్రస్తుతం అరట్టై స్థానిక యాప్‌గా క్రేజ్‌ సొంతం చేసుకుంటోంది. అప్‌డేట్లు చేసుకుంటూ, కొత్త ఫీచర్లు చేర్చుకుంటూ వెళితే ప్రత్యామ్నాయంగా మారొచ్చని నిపుణులు చెబుతున్నారు.