ఫిక్స్‌డ్‌ డిపాజిట్‌.. ఈ పత్రాలు ఇచ్చారా?

బ్యాంకులు, బ్యాంకింగేతర ఆర్థిక సంస్థల్లో ఫిక్స్‌డ్‌ డిపాజిట్లు ఉన్నాయా? వీటిపై వచ్చే వడ్డీపై మూలం వద్ద పన్ను మినహాయింపు (టీడీఎస్‌) విధించకుండా ఫారం 15జీ / ఫారం15హెచ్‌ సమర్పించేందుకు సమయం ఇదే.

 ఆదాయపు పన్ను పరిధిలోకి రాని వారు, వడ్డీ ఆదాయంపై పన్ను విధించకుండా బ్యాంకులు, ఆర్థిక సంస్థలకు ఈ పత్రాలను అందించాల్సి ఉంటుంది. ఆదాయపు పన్ను చట్టం 1961, సెక్షన్‌ 194ఏ ప్రకారం ఒక ఆర్థిక సంవత్సరంలో వడ్డీ ఆదాయం రూ.40వేల వరకూ ఉన్నప్పుడు ఎలాంటి టీడీఎస్‌ విధించరు. సీనియర్‌ సిటిజన్లకు ఈ పరిమితి రూ.50,000. ఈ పరిమితులు దాటినప్పుడు బ్యాంకులు 20 శాతం చొప్పున టీడీఎస్‌ను విధిస్తాయి. ఆర్థిక సంవత్సరంలో వడ్డీ తప్ప ఇతర ఆదాయాలేమీ లేనప్పుడు ఈ పత్రాలను బ్యాంకులో అందించాల్సి ఉంటుంది. వడ్డీ ఆదాయం నుంచి ఎలాంటి మినహాయింపులూ చేయొద్దని ఇచ్చే స్వీయ ధ్రువీకరణలివి.

ఈ పత్రాలను నేరుగా బ్యాంకు శాఖలకు వెళ్లి ఇవ్వొచ్చు. సంబంధిత బ్యాంకు ఆన్‌లైన్‌ బ్యాంకింగ్‌ ద్వారానూ సమర్పించవచ్చు. ఈ పత్రాలు ఒక ఆర్థిక సంవత్సరానికి మాత్రమే చెల్లుబాటు అవుతాయి. కాబట్టి, ప్రతి ఆర్థిక సంవత్సరమూ వీటిని అందించాల్సిందే.

ఎవరు ఇవ్వాలంటే..

•  60 ఏళ్ల లోపు భారతీయులు, హెచ్‌యూఎఫ్‌లు, ట్రస్టులు ఫారం 15జీ ఇవ్వడానికి అర్హులు. సంబంధిత ఆర్థిక సంవత్సరంలో ఎలాంటి పన్ను బాధ్యత లేనప్పుడు మాత్రమే ఇది వర్తిస్తుంది. కంపెనీలు, ప్రవాసులు ఈ పత్రాన్ని సమర్పించడం కుదరదు.
•  60 ఏళ్లకు మించిన సీనియర్‌ సిటిజన్లు ఫారం 15 హెచ్‌ను సమర్పించాల్సి ఉంటుంది.

ఆర్థిక సంవత్సరం మొత్తంలో ఎప్పుడైనా సరే ఈ పత్రాలను అందించేందుకు వీలుంది. కానీ,  ప్రారంభంలోనే ఈ పత్రాలను అందించడం వల్ల మూలం వద్ద పన్ను కోత పడకుండా చూసుకోవచ్చు. సమర్పించిన తేదీ నుంచే టీడీఎస్‌ను మినహాయించరు. ఉదాహరణకు అక్టోబరులో మీరు ఈ పత్రాన్ని ఇచ్చారనుకుందాం. అప్పటి నుంచి టీడీఎస్‌ ఉండదు. కానీ, ఏప్రిల్‌-సెప్టెంబరు వరకూ విధించిన టీడీఎస్‌ మొత్తాన్ని వెనక్కి ఇవ్వరు. ఆదాయపు పన్ను రిటర్నులు దాఖలు చేసి, రిఫండుగా పొందాల్సి ఉంటుంది. కాబట్టి, వడ్డీ ఆదాయంపై టీడీఎస్‌ విధించకముందే ఈ పత్రాలను ఇవ్వడం ఉత్తమం.