జీవిత బీమా పన్ను ఆదాకు మించి

ఆదాయపు పన్ను మినహాయింపు గురించి ఆలోచించే వారు ముందుగా చూసేది బీమా పాలసీలనే. పన్ను ప్రణాళికలను ప్రారంభించాల్సిన సమయం కావడంతో బీమా సంస్థలూ ఇప్పుడు పలు కొత్త పాలసీలతో ముందుకు వస్తుంటాయి. అయితే వీటిని కేవలం పన్ను ఆదా కోసమే ఎంచుకోవద్దు. అంతకు మించి కుటుంబానికి ఆర్థిక రక్షణ కల్పించేలా చూసుకోవాలి.

పాత ఆదాయపు పన్ను విధానం ఎంచుకున్న వారు.. సెక్షన్‌ 80సీ పరిమితి రూ.1,50,000 వరకూ వివిధ పెట్టుబడి పథకాల్లో మదుపు చేయాల్సి ఉంటుంది. ఇందులో జీవిత బీమా పాలసీలకు చెల్లించే ప్రీమియమూ వస్తుంది. ఇప్పటికే చాలామందికి పన్ను కోత ప్రారంభమైంది. దీంతో మినహాయింపు పొందడం కోసం భిన్న పథకాలను పరిశీలిస్తున్నారు. ఇందులో జీవిత బీమా పాలసీలకు ప్రాధాన్యం అధికంగా ఉంటుంది.

రక్షణకే ప్రాధాన్యం..

జీవిత బీమా ప్రథమ సూత్రం.. అనుకోని కష్టం వచ్చినప్పుడు కుటుంబానికి ఆర్థికంగా రక్షణ కల్పించాలి. పన్ను ప్రయోజనం కోసం మాత్రమే ఈ పాలసీని ఎంచుకున్న వారు ఎక్కువ ప్రీమియం పాలసీలను కొనుగోలు చేస్తుంటారు. దీనివల్ల మీ పన్ను ఆదా లక్ష్యం నెరవేరుతుంది. కానీ, కుటుంబానికి అవసరమైన రక్షణ మాత్రం లభించకపోవచ్చు.

బాధ్యతలకు తగ్గట్టుగా..

ముందుగా మీకు ఎంత మొత్తానికి బీమా అవసరమో చూసుకోండి. మీ ఆదాయం, జీవన శైలి, బాధ్యతలు, అప్పులు అన్నీ లెక్కించుకొని ఎంత విలువైన పాలసీని తీసుకోవాలన్నది చూసుకోవాలి. ఉదాహరణకు పిల్లల వయసు అయిదేళ్లు అనుకుందాం. రాబోయే 18 ఏళ్లపాటు మీపై ఆధారపడి ఉంటారనుకుందాం. అంటే.. 18 ఏళ్లపాటు వారి అవసరాలను తీర్చే మొత్తంతో బీమా పాలసీని తీసుకోవాలి. మీ వార్షికాదాయానికి 10-12 రెట్ల వరకూ జీవిత బీమా పాలసీ ఉండటం ఎప్పుడూ మంచిది. అంతేకానీ, కేవలం పన్ను ఆదా కోసం చూసుకుంటూ.. తక్కువ మొత్తం పాలసీని తీసుకోవడం కుటుంబానికి శ్రేయస్కరం కాదు.

కొత్తగా తీసుకుంటుంటే..

ఇప్పటి వరకూ బీమా పాలసీ తీసుకోని వారు.. టర్మ్‌ పాలసీకి ప్రాధాన్యం ఇవ్వండి. తక్కువ ప్రీమియానికి, అధిక రక్షణ లభిస్తుంది. పన్ను ఆదాకూ ఉపయోగపడుతుంది. పాలసీని ఏటా పునరుద్ధరించుకోవాల్సి ఉంటుంది. సాధారణ టర్మ్‌ పాలసీలను ఎంచుకుంటే.. గడువు తీరిన తర్వాత ఎలాంటి మొత్తమూ వెనక్కి రాదు. ఇప్పుడు కొత్తగా కొన్ని టర్మ్‌ పాలసీలు ప్రీమియం వెనక్కి ఇస్తామని చెబుతున్నాయి. వీటికి కాస్త అధిక ప్రీమియం ఉంటుంది. వీటికి బదులు సాధారణ టర్మ్‌ పాలసీలను ఎంచుకునే ప్రయత్నం చేయొచ్చు. పాలసీ అవసరం లేదు అనుకుంటే.. ప్రీమియం చెల్లింపును కావాలనుకున్నప్పుడు ఆపేయొచ్చు. మారుతున్న అవసరాలను బట్టి, పాలసీ విలువనూ పెంచుకునే ప్రయత్నం చేయొచ్చు.

పెట్టుబడి కోసమూ..

కుటుంబ ఆర్థిక రక్షణ కోసం పాలసీని తీసుకున్న తర్వాత సంపద సృష్టి కోసం బీమా పాలసీలను ఎంచుకోవచ్చు. ఇందులోనూ యూనిట్‌ ఆధారిత బీమా పాలసీలు(యులిప్‌), ఎండోమెంట్‌ పాలసీల వంటివి పరిశీలించాలి. యులిప్‌లను ఎంచుకునేటప్పుడు ఎన్నేళ్లపాటు, ఎంత ప్రీమియం చెల్లించాలి అనే విషయం గమనించాలి. కనీసం అయిదేళ్ల ప్రీమియం చెల్లిస్తేనే ఈ పాలసీలకు స్వాధీన విలువ వస్తుంది. మార్కెట్‌ హెచ్చుతగ్గుల ప్రభావం కొంత ఉంటుంది. దీర్ఘకాలిక దృష్టితో ఈ పాలసీని ఎంచుకోవాలి. చిన్న వయసులో ఉన్న వారు యులిప్‌లను ఎంచుకున్నప్పుడు ఈక్విటీ ఆధారిత ఫండ్లకు ప్రాధాన్యం ఇవ్వాలి. దీనివల్ల 15 ఏళ్ల తర్వాత మంచి రాబడిని అందుకునేందుకు వీలవుతుంది.

ఇప్పటికే జీవిత బీమా పాలసీలుంటే.. ఒకసారి దానిని సమీక్షించుకోండి. మారిన మీ ఆర్థిక పరిస్థితులు, బాధ్యతలు, జీవన శైలి, ద్రవ్యోల్బణంలాంటి అంశాలను పరిగణనలోకి తీసుకొని, ఆ మేరకు బీమా విలువ ఉందా లేదా చూసుకోండి. అప్పుడే మీ కుటుంబం ఎలాంటి పరిస్థితులనైనా తట్టుకొని, నిలబడగలదని గుర్తుంచుకోండి.

అవసరాలు చూడాలి

మీ కుటుంబ అవసరాల మేరకు మాత్రమే పాలసీని తీసుకోవాలి. పన్ను ప్రయోజనాలను ఆ పాలసీ కల్పించే అదనపు ప్రయోజనంగానే చూడాలి. ముందుగా ఆ పాలసీ అందించే ప్రయోజనాలన్నీ తెలుసుకోవాలి. అదే తరహాలో మిగతా బీమా సంస్థలు అందిస్తున్న పాలసీని పోల్చి చూడాలి. ఇందులో ఏది మీకు అనువుగా ఉందో చూసుకొని, ఆ పాలసీని ఎంచుకోవాలి.