Telecom coverage: టెలికాం కంపెనీలకు ట్రాయ్‌ ఆదేశాలు.. వెబ్‌సైట్లో కవరేజీ మ్యాప్‌ ఉంచాల్సిందే!

Telecom coverage | ఇంటర్నెట్‌ డెస్క్‌: నెట్‌వర్క్‌ బాగుంటుంది కదా అని ఫలానా టెలికాం కంపెనీ సిమ్‌ కార్డు తీసుకుంటాం. తీరా తీసుకున్నాక మనం నివసించే ప్రదేశంలో ఆ నెట్‌వర్కే సరిగా ఉండదు. ఒకవేళ మారుద్దామని అనిపించినా ఆ నెట్‌వర్క్‌ ఎలా ఉంటుందో అన్న భయంతో పాత సిమ్‌కార్డునే నెట్టుకొచ్చేస్తుంటారు కొందరు. ఇది ఏ ఒక్కరి సమస్యో కాదు.. చాలా మంది మొబైల్‌ వినియోగదారులు ఎదుర్కొనే ఇబ్బందుల్లో ఇదీ ఒకటి. ఈ క్రమంలోనే టెలికాం కంపెనీలకు ట్రాయ్‌ కీలక ఆదేశాలు జారీ చేసింది.

ఫోన్‌ పోయిందా? ఈ పోర్టల్‌లో ఫిర్యాదు చేస్తే సిమ్‌ మార్చినా కనిపెట్టొచ్చు!

వైర్‌లెస్‌ టెలికాం ప్రొవైడర్లు జియో స్పేషియల్‌ కవరేజీ మ్యాప్స్‌ను తమ వెబ్‌సైట్‌లో అందుబాటులో ఉంచాలని ట్రాయ్‌ సూచించింది. అంటే ఏయే ప్రాంతాల్లో తమ నెట్‌వర్క్‌ కవరేజీ అందుబాటులో ఉందో ఆయా మ్యాప్స్‌లో చూపించాల్సి ఉంటుంది. 2జీ, 3జీ, 4జీ, 5జీ సర్వీసులకు సంబంధించి కవరేజీ వివరాలు అందులో కనిపిస్తాయి. దీనివల్ల తమ ప్రదేశంలో ఏ నెట్‌వర్క్‌ లభిస్తుందో వినియోగదారుడు తెలుసుకోవడానికి వీలు పడుతుందని ట్రాయ్‌ పేర్కొంది. అంతేకాదు ఏ నెట్‌వర్క్‌ను ఎంచుకుంటే మెరుగైన కవరేజీ లభిస్తుందో వినియోగదారుడు తెలుసుకోగలడని తెలిపింది. టెలికాం ప్రొవైడర్లతో పలు అంశాలపై సంప్రదింపులు జరుపుతున్న ట్రాయ్‌.. ఈ అంశాన్నీ చర్చకు పెట్టింది. దీనిపై ఆయా కంపెనీలు సమర్పించిన నివేదికల ఆధారంగా ట్రాయ్‌ తుది మార్గదర్శకాలు జారీ చేయనుంది.