ఆకస్మిక తనిఖీల్లో భారీ సొత్తు స్వాధీనం

ఈనాడు, హైదరాబాద్‌: మల్టీజోన్‌-1 పరిధిలోని 16 జిల్లాల్లో చేపట్టిన ఆకస్మిక తనిఖీల్లో పోలీసులు భారీ సొత్తు స్వాధీనం చేసుకున్నారు. ఎన్నికల సన్నాహాల్లో భాగంగా మల్టీజోన్‌-1 ఐజీ రంగనాథ్‌ ఆదేశాల మేరకు  ఆయా పోలీస్‌స్టేషన్ల పరిధిలో శుక్రవారం సాయంత్రం 5 నుంచి శనివారం సాయంత్రం 5 గంటలవరకూ తనిఖీలు నిర్వహించారు. ఇందులో రూ.2,81,36,128 నగదు, రూ.4,05,823 విలువైన మద్యం, రూ.3,15,788 విలువైన 15,479 కిలోల గంజాయి స్వాధీనం చేసుకున్నారు. దీనికి సంబంధించి 15 కేసులు నమోదు చేసి, 25 మందిని అదుపులోకి తీసుకున్నారు. 8 వాహనాలు స్వాధీనం చేసుకున్నారు.