మట్టి దారిలో అవస్థల ప్రయాణం

కుందుర్పి, న్యూస్‌టుడే: మండలంలోని ఎనుములదొడ్డి నుంచి శెట్టూరు మండలం యరబోరేపల్లికి ఏడు కిలోమీటర్ల మేర మట్టి దారి గుంతలు తేలి ప్రయాణానికి ఏమాత్రం అనుకూలంగా లేదని గ్రామస్థులు ఆవేదన వ్యక్తం చేశారు. ఎనుములదొడ్డి గ్రామంలో ప్రసిద్ధి చెందిన శ్రీరాధాస్వామి ఆశ్రమానికి ప్రతి ఆదివారం సత్సంగం కార్యక్రమానికి వివిధ మండలాల నుంచి భక్తులు వస్తుంటారు. రోడ్డు బాగా లేకపోవడంతో ఇబ్బందులు పడుతున్నారు. ఐదేళ్ల పాలనలో వైకాపా ప్రజాప్రతినిధులు, అధికారులు కనీసం మరమ్మతులు చేయించలేదని వారు వాపోయారు. ఇప్పటికైనా అధికారులు స్పందించి దారిని బాగు చేయాలని కోరారు. ఈ విషయమై మండల ఇంజినీరు వరప్రసాద్‌తో మాట్లాడగా ప్రతిపాదనలు పంపామని, నిధులు మంజూరు కాగానే రోడ్డు నిర్మాణం ప్రారంభిస్తామని తెలిపారు.