చిట్టడివి కాదు.. జగనన్న కాలనీనే

హోతూరు దారిలో కంపచెట్లతో నిండి...

ఉరవకొండ, న్యూస్‌టుడే: జగనన్న కాలనీల్లో తమ ప్రభుత్వం పేదలకు స్థలాలు ఇవ్వడమే కాదు.. ఊళ్లనే నిర్మిస్తోందని సీఎం జగన్‌, వైకాపా నాయకులు సభలు, సమావేశాల్లో ఊదరగొట్టారు. ఆచరణలో ఇళ్లు నిర్మించిన దాఖలాలు పెద్దగా లేవనే చెప్పాలి. ఉరవకొండ శివారు చాబాల దారిలోని జగనన్న కాలనీలో 220 ప్లాట్లు ఉన్నాయి. అందులో 179 మందికి పట్టాలు ఇచ్చారు. ఇప్పటి వరకు ఒక్క లబ్ధిదారుడు మాత్రమే ఇల్లు నిర్మించుకున్నాడు. మిగతా ప్లాట్లలో కంపలు పెరిగాయి. పట్టణ శివారు హోతూరు దారిలోని జగనన్న కాలనీలో 121 ప్లాట్లు ఉండగా, 108 మంది లబ్ధిదారులకు పట్టాలు ఇచ్చారు. ఇక్కడ ఇళ్ల నిర్మాణాలకు లబ్ధిదారులు ముందుకు రాలేదు. ఈ రెండు కాలనీలకు దగ్గరలో శ్మశానం ఉంది. పైగా పట్టణానికి దూరంగా ఉన్నాయి. ఇళ్ల నిర్మాణాలకు ఆ ప్రదేశం అనువుగా లేదని లబ్ధిదారులు ఆసక్తి చూపలేదు. దాంతో రెండు కాలనీల్లో కంపలు విపరీతంగా పెరిగి చిట్టడవులను తలపిస్తున్నాయి.