‘ఐస్‌క్రీమ్‌ మ్యాన్‌’ ఇకలేరు

రఘునందన్‌ కామత్‌

మంగళూరు, న్యూస్‌టుడే : ఐస్‌క్రీముల రాజధాని మంగళూరులో ‘ఐస్‌క్రీమ్‌ మ్యాన్‌’గా గుర్తింపు దక్కించుకున్న రఘునందన్‌ కామత్‌ (70) శుక్రవారం రాత్రి కన్నుమూశారు. ముంబయిలో 1984లో నేచురల్స్‌ ఐస్‌క్రీమ్‌ను మొదటిసారిగా ఆయన విక్రయించారు. ప్రస్తుతం 40కు పైగా నగరాల్లో 140కు పైగా శాఖలతో ఏటా రూ.400 కోట్ల వ్యాపారాన్ని సంస్థ నిర్వహిస్తోంది. సహజమైన పండ్లను ఉపయోగించి, ఐస్‌క్రీమ్‌లను తయారు చేయడం, రసాయనాలు వాడకపోవడంతో వినియోగదారుల విశ్వాసాన్ని దక్కించుకున్నారు. ముల్కిలో పేద కుటుంబంలో జన్మించిన ఆయన తండ్రి పండ్ల వ్యాపారి. తన సోదరునితో కలిసి 15 ఏళ్ల వయసు ఉన్నప్పుడు హోటల్‌లో పని చేసేందుకు ముంబయికి చేరుకున్నారు. తనకు 30 ఏళ్లు వచ్చే సరికి సొంతంగా హోటల్‌ పెట్టారు. ఆ తర్వాత ‘నేచురల్స్‌ ఐస్‌క్రీమ్స్‌’ సంస్థను నెలకొల్పిన తర్వాత ఆయన వెనుదిరిగి చూడలేదు. కామత్‌ మృతికి మంగళూరులో ఐస్‌క్రీమ్‌ వ్యాపారుల సంఘం సభ్యులు నివాళి అర్పించారు.