Jadcherla: లాకప్‌లో కోడిపుంజు.. ఇంతకీ దొంగ ఎవరు?

న్యూస్‌టుడే, జడ్చర్ల గ్రామీణం: లాకప్‌లో కోడిపుంజును ఉంచిన ఆసక్తికర ఘటన జడ్చర్ల పోలీస్‌ స్టేషన్‌లో సోమవారం చోటు చేసుకుంది. జడ్చర్ల పురపాలిక పరిధి బూరెడ్డిపల్లి గ్రామ సమీపంలో ఓ బాలుడు కోడిపుంజును తీసుకెళ్తుండగా.. గమనించిన స్థానికులు చోరీ చేశాడని పోలీసులకు ఫిర్యాదు చేశారు. పోలీసు సిబ్బంది వచ్చి బాలుడితో పాటు కోడిపుంజును ఠాణాకు తీసుకొచ్చారు. నిందితుడు మైనర్‌ కావటంతో తల్లిదండ్రులకు పిలిపించి వారికి అప్పగించారు. కోడిపుంజు ఎవరిదో తెలియలేదు. ఎవరి నుంచీ ఫిర్యాదు రాలేదు. కోడిపుంజు బయట ఉంటే కుక్కలు దాడిచేసే అవకాశముందని భావించిన సీఐ రమేశ్‌బాబు దాన్ని లాకప్‌లో పెట్టి గింజలు, నీరు ఏర్పాటు చేయించారు. ఠాణాకు వెళ్లినవారంతా లాకప్‌లో ఉన్న కోడిపుంజును ఆసక్తిగా చూశారు. సీఐని వివరణ కోరగా భద్రత కల్పించేందుకే లాకప్‌లో పెట్టినట్లు చెప్పారు.