అన్నదానం నిధుల రికవరీ

అచ్చంపేట న్యూటౌన్‌, న్యూస్‌టుడే: ఉమామహేశ్వర క్షేత్రంలో పక్కదారి పట్టిన నిత్యాన్నదాన నిధులను రికవరీ చేసినట్లు ఆలయ కార్య నిర్వాహణాధికారి శ్రీనివాస్‌రావు సోమవారం ఒక ప్రకటనలో తెలిపారు. ఈ నెల 10న ‘అన్నదానం నిధులు పక్కదారి’ పేరుతో ‘ఈనాడు’లో ప్రచురితమైన కథనానికి అధికారులు స్పందించారు. క్షేత్రంలోని నిత్యాన్నదాన సత్రంలో విధులు నిర్వహించిన శంకర్‌ అన్నదాన విరాళాలను పక్కదారి పట్టించినట్లు గుర్తించిన అధికారులు గత 12 రోజుల పాటు పూర్తి స్థాయిలో విచారణ నిర్వహించి ఎట్టకేలకు రూ.6.16 లక్షలు వ్యక్తిగత అవసరాలకు వినియోగించుకున్నట్లు గుర్తించారు. ఉన్నతాధికారుల ఆదేశాల మేరకు సోమవారం రూ.3 లక్షలు బ్యాంకు (నిత్యాన్నదాన)ఖాతాలో జమ చేసినట్లు పేర్కొన్నారు. మిగిలిన పూర్తి స్థాయి నగదును మరో 15 రోజుల్లోపు చెల్లించే విధంగా హామీ ఇచ్చినట్లు తెలిపారు. నిధులను పక్కదారి పట్టించిన శంకర్‌ను ప్రస్తుతం విధుల నుంచి తొలగించినట్లు దేవస్థాన ఛైర్మన్‌ కందూరి సుధాకర్‌ పేర్కొన్నారు.