20 క్వింటాల ఇప్ప పువ్వు స్వాధీనం

పర్లాఖెముండి : జిల్లాలో ఆబ్కారీ, పోలీసు అధికారులు ముమ్మరంగా  తనిఖీలు నిర్వహిస్తున్నారు. ఈ నేపథ్యంలో సోమవారం ఉదయం రాయగడ ఠాణా పరిధిలోని  ఇన్‌స్పెక్టర్‌  దయానిధి భారిక్, ఏఎస్సై లక్ష్మీదేవి, సిబ్బందితో  పొర్సల్ గ్రామ ప్రాంతంలో తనిఖీలు నిర్వహించారు. ఈ తనిఖీల్లో  వ్యాన్‌లో తరలిస్తున్న 50 బస్తాల ఇప్ప పువ్వును పట్టుకుని ఇద్దరిని అదుపులోకి తీసుకున్నట్లు ఇన్‌స్పెక్టర్‌ తెలిపారు.  అక్రమ సారా తయారీకి నువాగడ గ్రామం నుంచి రాయగడ వైపునకు ఇప్ప పువ్వును రవాణా చేస్తున్న నువాగడ గ్రామానికి సాగర్ పాయిక్(26), ఖగేష్  పాయిక్(21)లను అదుపులోకి తీసుకున్నారు. నిందితులపై కేసు నమోదు చేసినట్లు చెప్పారు. పట్టుబడిన 50 బస్తాల ఇప్ప పువ్వు  20 క్వింటాళ్లు ఉంటుందని,  దీని విలువ సుమారు రూ.60 వేలకు పైగా ఉంటుందని పోలీసులు తెలిపారు.