ఏపీ ఎక్స్‌ప్రెస్‌ బోగీలో పొగలు

బోగీలో నుంచి పొగలు వస్తున్న దృశ్యం

నెక్కొండ, న్యూస్‌టుడే: ఏపీ ఎక్స్‌ప్రెస్‌ రైలు బోగీలో పొగలు వ్యాపించాయి. అప్రమత్తమైన డ్రైవర్లు వెంటనే రైలును నిలిపివేశారు. భయాందోళనకు గురైన ప్రయాణికులు బోగి నుంచి కిందికి దిగేశారు. ఈ ఘటన వరంగల్‌ జిల్లా నెక్కొండ రైల్వే స్టేషన్‌లో శుక్రవారం ఉదయం జరిగింది. ప్రయాణికులు, రైల్వే సిబ్బంది వివరాల ప్రకారం.. నెక్కొండ రైల్వే స్టేషన్‌ రెండో నెంబరు ప్లాట్‌ఫాం మీదుగా తక్కువ వేగంతో విశాఖపట్టణం నుంచి దిల్లీ వెళ్తున్న ఏపీ ఎక్స్‌ప్రెస్‌ (ట్రైన్‌ నెంబర్‌ 20805) ఇంజిన్‌ నుంచి.. రెండో బోగీ ఎస్‌6లో బ్రేక్‌ల వద్ద సాంకేతిక లోపం ఏర్పడింది. దీంతో నిప్పురవ్వలతో పాటు దట్టమైన పొగ వ్యాపించడంతో రైలును నిలిపివేశారు. రైల్వే సిబ్బంది అగ్నిమాపక యంత్రాలతో నిప్పురవ్వలను అదుపు చేశారు. అరగంట పాటు శ్రమించి మరమ్మతులు చేపట్టారు. అనంతరం ప్రయాణికులు అదే బోగీలోకి ఎక్కారు. రైలు యథావిధిగా ప్రయాణం కొనసాగించింది.