వైకాపా ప్రభుత్వ తీరుతో గిరిజనులకు తీరని అన్యాయం

అంబేడ్కర్‌ కూడలిలో నిరసన తెలుపుతున్న రాష్ట్ర గిరిజన సమాఖ్య నాయకులు

మదనపల్లె పట్టణం, న్యూస్‌టుడే : గిరిజనులకు వైకాపా ప్రభుత్వం తీరని అన్యాయం చేసిందని రాష్ట్ర గిరిజన సమాఖ్య (ఆర్‌జీఎస్‌) వ్యవస్థాపక అధ్యక్షుడు కోనేటి దివాకర్‌ అన్నారు. వాల్మీకులను ఎస్టీ జాబితాలో చేర్చుతూ అసెంబ్లీలో ముఖ్యమంత్రి చేసిన ప్రకటనను వ్యతిరేకిస్తూ ఆర్జీఎస్‌ ఆధ్వర్యంలో పట్టణంలోని ఆర్టీసీ బస్టాండు సమీపంలోని అంబేడ్కర్‌ విగ్రహం వద్ద గిరిజనులు నిరసన కార్యక్రమం చేశారు. ముందుగా విగ్రహానికి పూలమాల వేసి, వినతిపత్రం అందజేశారు. ఈ సందర్భంగా నిరసనకారులు ప్రభుత్వానికి వ్యతిరేకంగా నినాదాలు చేశారు. అనంతరం దివాకర్‌ మాట్లాడుతూ... రాష్ట్రంలో 40 లక్షల జనాభా కలిగిన గిరిజనులు నేటికీ అవిద్య, అనారోగ్యంతో దయనీయమైన జీవితం గడుపుతున్నారని అలాంటి వారిని ప్రభుత్వం ఆదుకోవాల్సింది పోయి, అన్యాయం చేయడం తగదన్నారు. గిరిజనులు రాజకీయంగా, ఆర్థికంగా, సామాజికంగా చాలా వెనుకపడ్డారని వీరిని ఆదుకోవడానికి ప్రభుత్వం ఏం చర్యలు చేపట్టిందో శ్వేతపత్రం విడుదల చేయాలన్నారు. వాల్మీకులను ఎస్టీ జాబితాలో చేర్చినట్లైతే గిరిజనుల జీవన విధానానికే ముప్పు వాటిల్లే ప్రమాదం ఉందన్నారు. వాల్మీకులు నేడు ఆర్థికంగా, రాజకీయంగా అభివృద్ధి చెంది వారికంటూ సముచిత స్థానాన్ని కలిగి ఉన్నారన్నారు. రాష్ట్ర ప్రభుత్వం తీసుకున్న అనాలోచిత నిర్ణయాన్ని తక్షణమే ఉపసంహరించుకోవాలని లేని పక్షంలో రాష్ట్రవ్యాప్తంగా ఉద్యమాలు లేవనెత్తుతామన్నారు. వైకాపా ప్రభుత్వానికి వచ్చే ఎన్నికల్లో తగిన గుణపాఠం చెబుతామన్నారు. నిరసన కార్యక్రమంలో కొండ్రెడ్డి, శేఖర్‌ కిల్లా, రెడ్డిశేఖర్‌, నరేంద్ర, కె.గంగులప్ప, దేవేంద్ర, చంద్ర, రామచంద్ర, కిరణ్‌, నాగరాజు తదితరులు పాల్గొన్నారు.