నగదు, మద్యం వెదజల్లి ర్యాలీకి జనసమీకరణ

పెనమలూరు, పోరంకి, న్యూస్‌టుడే: కృష్ణా జిల్లా పెనమలూరు వైకాపా అభ్యర్థిగా మంత్రి జోగి రమేష్‌ నామినేషన్‌ దాఖలు సందర్భంగా బుధవారం నిర్వహించిన బలప్రదర్శన ప్రయాణికులకు నాలుగు గంటలు నరకం చూపింది. పెనమలూరు కూడలికి విజయవాడ వైపు పోరంకి, కామయ్యతోపు వరకు.. కంకిపాడు వైపు నుంచి వచ్చే వాహనాలు గంగూరు, ఈడుపుగల్లు, గోశాల వరకు ట్రాఫిక్‌లో చిక్కుకున్నాయి. డప్పు వాయిద్యాలు, నృత్యాలతో ప్రదర్శన నిలిచింది. ప్రయాణికుల వాహనాలు కిలోమీటర్ల మేర బారులు దీరాయి. 108, ప్రైవేటు ఆసుపత్రుల అంబులెన్సులు ట్రాఫిక్‌లో గంటలపాటు ఇరుక్కుపోయాయి. మండుటెండల్లో చిన్నపిల్లలు, వృద్ధులు, దివ్యాంగులు తీవ్ర అవస్థల పాలయ్యారు. కనీసం మంచినీరందక విలవిల్లాడారు. తాడిగడప 100 అడుగుల రోడ్డు నుంచి ప్రారంభమైన ర్యాలీ పెనమలూరు సెంటర్‌ వరకు సాగింది. నామినేషన్‌ కార్యక్రమానికి భారీగా జనసమీకరణ కోసం మద్యం, నగదు పంపిణీ చేశారు. ఒక వ్యక్తికి రూ.500, మద్యం సీసా చేతిలో పెట్టి పల్లెల నుంచి ఆటోల్లో రప్పించారు. ఎన్నికల కోడ్‌ ఉల్లంఘిస్తూ హల్‌చల్‌ చేయడంతోపాటు పిల్లలను ప్రచారానికి వాడుకున్నారు.