బాపట్ల తీరానికి అత్యంత దగ్గరగా ‘మిగ్‌జాం’.. గంటకు 12కిమీ వేగంతో..

విశాఖపట్నం: తీవ్ర తుపాను మిగ్‌జాం (Cyclone Michaung) మరికొద్ది గంటల్లో తీరం దాటనుంది. బాపట్ల సమీపంలోకి తుపాను వచ్చినట్లు విశాఖ వాతావరణ కేంద్రం అధికారి సునంద తెలిపారు. బాపట్ల తీరానికి అత్యంత దగ్గరగా ‘మిగ్‌జాం’ కదులుతోందని చెప్పారు. మంగళవారం ఉదయం గంటకు 7కి.మీ వేగంతో కదిలిన తుపాను.. ప్రస్తుతం 12కి.మీ వేగంతో వస్తోందని తెలిపారు. విశాఖలో మీడియాతో సునంద మాట్లాడారు.  

‘‘తుపాను ఉత్తర దిశగా కదులుతూ బాపట్ల వద్ద తీరం దాటుతుంది. తీరం దాటే సమయంలో సముద్రంలో అలలు భారీగా ఎగసిపడతాయి. తుపాను తీరం దాటి భూభాగంపైకి వచ్చాక క్రమంగా బలహీనపడుతుంది. మరో 24 గంటలపాటు రాష్ట్రంలో చాలా చోట్ల వర్షాలు కురుస్తాయి’’ అని ఆమె తెలిపారు. తుపాను నేపథ్యంలో బాపట్ల, నిజాంపట్నం, మచిలీపట్నంలో 10వ నంబర్‌ ప్రమాదహెచ్చరిక కొనసాగుతోంది. కాకినాడలో 9, విశాఖ, కళింగపట్నంలో 3వ నంబర్‌ హెచ్చరిక జారీ చేశారు. తుపాను ప్రస్తుతం బాపట్లకు 60కి.మీ దూరంలో ఉంది. ‘మిగ్‌జాం’ ప్రభావంతో బాపట్ల, సూర్యలంక తీరాల్లో గంటకు 90-110 కి.మీ వేగంతో గాలులు వీస్తున్నాయి.