అంధుడైన గురువును హేళన చేస్తూ రీల్‌.. విద్యార్థుల సస్పెన్షన్‌

సామాజిక మాధ్యమాల పిచ్చిలో యువత తరచూ పెడదోవ పడుతున్నారనేందుకు కేరళలో జరిగిన ఈ ఉదంతమే నిదర్శనం. అంధుడైన గురువును కొందరు విద్యార్థులు తరగతి గదిలో ఆట పట్టిస్తూ హేళన చేశారు. తమ పిచ్చిచేష్టలను వీడియో తీసి ఇన్‌స్టాగ్రామ్‌లోనూ పోస్టు చేశారు. ఎర్నాకుళం మహారాజా ప్రభుత్వ కళాశాలలో రాజనీతిశాస్త్రం బోధించే అధ్యాపకుడికి చూపు లేదు. అయినా అదే కళాశాలలో చదువుకొని గురువు స్థాయికి ఆయన ఎదిగారు. ఇటీవల ఓ తరగతి గదిలో పాఠం చెబుతుండగా.. కొందరు విద్యార్థులు ఆయన చుట్టూ చేరి అల్లరి చేశారు. దృష్టిలోపాన్ని ప్రస్తావిస్తూ అవమానకరంగా మాట్లాడారు. ఈ వీడియో వైరల్‌గా కావడంతో గురువు పట్ల విద్యార్థుల తీరుపై నెటిజన్లు మండిపడ్డారు. విషయం కళాశాల యాజమాన్యం దృష్టికి వెళ్లడంతో ఆ ఘటనకు బాధ్యుడైన ఓ విద్యార్థి నేతతోపాటు ఆరుగురిని సస్పెండ్‌ చేశారు. బాధిత అధ్యాపకుడు దీనిపై మాట్లాడుతూ..‘‘నేను ఒక గంటసేపు బోధనకు రెండు గంటలు సిద్ధమై తరగతి గదికి వచ్చా. ఆ వీడియో చూసి నా స్నేహితులు, బంధువులు బాధపడ్డారు. విద్యార్థుల భవిష్యత్తు దృష్ట్యా కళాశాల పరిధిలోనే ఈ సమస్యను పరిష్కరించుకుంటాం’’ అని అన్నారు.