Indian Railway: రైళ్లకు ప్రమాద సంకేతం.. రాకపోకల్ని గుర్తించే యంత్రాల్లో లోపాలు

ఇప్పటికే ఏడు జోన్లకు చేరుకున్న 3 వేల యూనిట్లు

దిల్లీ: నిర్దిష్ట మార్గంలో రైలు పట్టాలు ఖాళీగా ఉన్నాయా, రైళ్లేమైనా ఆ సమయంలో వెళ్తున్నాయా అనేది చెప్పడానికి ఉపయోగపడే సెన్సర్‌ యంత్రాల్లో లోపాలున్నట్లు బయటపడింది. పనితీరు సరిగా లేని వీటిని ఉపసంహరించుకోకుండా వాడడం కొనసాగిస్తే ఒడిశాలోని బాలేశ్వర్‌లో ఇటీవల జరిగిన తరహా ఘోర ప్రమాదాలకు దారితీయవచ్చని వారు హెచ్చరిస్తున్నారు. ‘మల్టీ సెక్షన్‌ డిజిటల్‌ యాక్సిల్‌ కౌంటర్‌’ (ఎంఎస్‌డీఏసీ) వ్యవస్థలు ఒక్కొక్కటి రూ.5 లక్షలు ఖరీదైనవి. ఇలాంటి 4,000 యూనిట్లను రూ.200 కోట్లతో ఓ ప్రైవేటు సంస్థ వద్దనుంచి రైల్వే కొనుగోలు చేసింది. వీటిని ‘రైల్వే నమూనాలు, ప్రమాణాల సంస్థ’ (ఆర్‌డీఎస్‌వో) ఆమోదించింది. తూర్పు, ఆగ్నేయ-మధ్య, ఆగ్నేయ, ఉత్తర, మధ్య, వాయవ్య, ఉత్తర-మధ్య రైల్వే.. ఈ ఏడు జోన్లకు లోపభూయిష్టమైన 3,000 యూనిట్లు ఇప్పటికే చేరుకున్నాయి. వీటి పనితీరును వాటిలో ప్రయోగాత్మకంగా పరిశీలిస్తున్నారు.

 వీటి ఉపయోగం ఏమిటంటే..

రెండు ప్రాంతాల మధ్య రైలు మార్గం ఖాళీగానే ఉందా, ఏదైనా రైలు అక్కడ ఉందా అనేది తెలుసుకుని వేరే రైళ్లకు సిగ్నల్‌ ఇవ్వడానికి ఎంఎస్‌డీఏసీ వ్యవస్థ ఉపయోగపడుతుంది.  ఎన్ని పెట్టెలు వెళ్లాయో లెక్కించే యూనిట్‌ కూడా దీనిలోనే ఉంటుంది. పట్టాలపై రద్దీ గురించి స్టేషన్‌మాస్టర్‌కు ఇవి స్పష్టతనిస్తాయి.