రామాలయం నిర్మాణ వ్యవహారంతో ఏకీభవించలేం: ఉదయనిధి

చెన్నై, న్యూస్‌టుడే: అయోధ్యలో మసీదు కూల్చి రామాలయం నిర్మించిన వ్యవహారంతో ఏకీభవించలేమని తమిళనాడు ముఖ్యమంత్రి స్టాలిన్‌ తనయుడు, మంత్రి ఉదయనిధి తెలిపారు. చెన్నైలో గురువారం ఆయన విలేకర్లతో మాట్లాడారు. దివంగత మాజీ ముఖ్యమంత్రి కరుణానిధి చెప్పినట్లు డీఎంకేవారు ఏ మతానికి, విశ్వాసానికి వ్యతిరేకం కాదన్నారు. అయోధ్యలో రాముడికి ఆలయం నిర్మించడంపై తమకెలాంటి అభ్యంతరం లేదన్నారు. అక్కడి మసీదు కూల్చివేసి ఆలయం నిర్మించిన వ్యవహారంతో ఏకీభవించలేమని తెలిపారు. గతంలో సనాతన ధర్మంపై ఉదయనిధి చేసిన వ్యాఖ్యలు దేశవ్యాప్తంగా దుమారం రేపిన విషయం తెలిసిందే.