ఇంకా చెరలోనే 16 మంది భారతీయులు

దౌత్యాధికారులతో మాట్లాడించామన్న ఇరాన్‌

దుబాయ్‌: హర్మూజ్‌ జలసంధి దగ్గర ఇరాన్‌ అదుపులోకి తీసుకున్న నౌకలోని 16 మంది భారత సిబ్బంది ఇంకా విడుదల కాలేదు. ఇరాన్‌ చెరలోనే ఉన్నారు. అయితే వీరికి దౌత్య సిబ్బందితో మాట్లాడే అవకాశం కల్పించామని టెహ్రాన్‌ పేర్కొంది. ఈ నెల 13న పోర్చుగీసు పతాకంతో ప్రయాణిస్తున్న ఈ నౌకను ఇరాన్‌ తన నియంత్రణలోకి తీసుకున్న సంగతి తెలిసిందే. ఆ సమయంలో నౌకలో 25 మంది సిబ్బంది ఉన్నారు. ఇందులో ఓ మహిళ సహా 17 మంది భారతీయుల ఉన్నారు. కేరళకు చెందిన ఆ మహిళను విడిచి పెట్టారు. మిగతావారిని స్వదేశానికి రప్పించేందుకు భారత్‌ తీవ్ర ప్రయత్నాలు చేస్తోంది. ఇరాన్‌ కూడా సానుకూలంగా స్పందిస్తోందని దౌత్య వర్గాలు పేర్కొంటున్నాయి.