అక్రమ రవాణా కాదు.. వారంతా మదర్సా విద్యార్థులే

స్పష్టంచేసిన ఉత్తర్‌ప్రదేశ్‌ అధికారులు

అయోధ్య: అక్రమంగా చిన్నారులను రవాణా చేస్తున్నారన్న అనుమానంతో శుక్రవారం తాము అదుపులోకి తీసుకున్న బస్సులో ఉన్నది మదర్సా విద్యార్థులని శనివారం ఉత్తర్‌ప్రదేశ్‌ అధికారులు తెలిపారు. వీరు రంజాన్‌ సెలవులను ముగించుకుని బిహార్‌లోని అరరియా నుంచి ఉత్తర్‌ప్రదేశ్‌లోని సహారన్‌పుర్‌ మదర్సాకు బయలుదేరినట్లు వెల్లడించారు. ఆ సమయంలో బస్సులో 95 మంది చిన్నారులు ఉన్నారని తెలిపారు. వీరంతా ఎనిమిది నుంచి 15 ఏళ్లలోపు వారేనన్నారు. చిన్నారుల అక్రమ రవాణా జరుగుతోందన్న అనుమానంతో వారిని అడ్డుకుని లఖ్‌నవూలోని ఓ శిబిరానికి తరలించామన్నారు. ప్రస్తుతం వారి తల్లిదండ్రులను సంప్రదిస్తున్నట్లు తెలిపారు.