Republic Day: ‘చంద్రయాన్‌-3.. బాలక్‌ రామ్‌’.. పరేడ్‌లో ఆకట్టుకున్న శకటాలు

దిల్లీ: దేశ రాజధాని దిల్లీ (Delhi)లో గణతంత్ర దినోత్సవాలు అంబరాన్నంటాయి. ఈ సందర్భంగా నిర్వహించిన పరేడ్‌ (Republic Day Parade)లో పలు రాష్ట్రాలు, కేంద్రపాలిత ప్రాంతాలు, కేంద్ర ప్రభుత్వ విభాగాలు ప్రదర్శించిన శకటాలు ఆకట్టుకున్నాయి. అంతరిక్ష రంగంలో సరికొత్త చరిత్ర లిఖిస్తూ భారత్‌ సాధించిన చంద్రయాన్‌-3 విజయం నుంచి అయోధ్యలో ఇటీవల కొలువైన బాల రామయ్య వరకూ అనేక విశేషాలను వీటిల్లో ప్రదర్శించారు. అవి సందర్శకుల మనసు దోచుకున్నాయి.

శకటాల విశేషాలివే..

• భారత అంతరిక్ష పరిశోధనా సంస్థ (ISRO) ప్రదర్శించిన శకటంలో చంద్రయాన్‌-3, ఆదిత్య ఎల్‌-1 మిషన్లు ఆకట్టుకున్నాయి. చంద్రుడిపై మన విక్రమ్‌ ల్యాండర్ దిగుతున్న దృశ్యాలను ఇందులో ప్రదర్శించారు. శకటంపై ఉన్న మహిళా శాస్త్రవేత్తలు జాబిల్లి ఉపరితలంపై ల్యాండర్‌ దిగిన శివశక్తి పాయింట్‌ను చూపించారు.
• మణిపుర్‌ శకటం ప్రత్యేకంగా నిలిచింది. ఈ రాష్ట్రంలో 500 ఏళ్ల చరిత్ర కలిగిన ‘ఇమా కెయితల్‌’ మార్కెట్‌ను ప్రదర్శించారు. దీన్ని పూర్తిగా మహిళా విక్రేతలే నడుపుతారు. ప్రపంచంలో మహిళలు నిర్వహిస్తున్న అతిపెద్ద మార్కెట్‌ ఇదే కావడం విశేషం.
• ఉత్తరప్రదేశ్‌ శకటంలో రామ్‌ లల్లా చిత్రం ఆకట్టుకుంది. అయోధ్యలో నవనిర్మిత భవ్య రామమందిర ప్రారంభోత్సవానికి గుర్తుగా దీన్ని ప్రదర్శించారు. శకటానికి ముందు బాలక్‌రామ్‌ విల్లు-బాణంతో దర్శనమిచ్చారు. దీంతో పాటు ప్రయాగ్‌రాజ్‌లో కుంభమేళాను చాటిచెప్పే ‘కలశం’, అయోధ్య దీపోత్సవ్‌, హైస్పీడ్‌ రైళ్లను ప్రదర్శించారు.
• కేంద్ర ఐటీ,  ఎలక్ట్రానిక్స్‌ మంత్రిత్వ శాఖ శకటంలో కృత్రిమ మేధ సామర్థ్యాన్ని ప్రదర్శించారు. ఆరోగ్యం, విద్య, సామాజిక సాధికారతకు ఏఐ ఎలా ఉపయోగపడుతోందో తెలిపారు.
• భారత్‌ అధ్యక్షతన విజయవంతమైన జీ20 సదస్సును కేంద్ర విదేశీ వ్యవహారాల శాఖ తమ శకటంలో ప్రదర్శించింది. దీనిపై ఏర్పాటు చేసిన ‘నమస్తే ముద్ర’ ఆకట్టుకుంది.
• మరికొద్ది రోజుల్లో దేశంలో సార్వత్రిక ఎన్నికలు జరగనున్న వేళ.. కేంద్ర ఎన్నికల సంఘం ఈ పరేడ్‌లో ప్రజాస్వామ్య స్ఫూర్తిని చాటిచెప్పింది. ఈవీఎంలో ఓటు వేస్తున్నట్లుగా రూపొందించిన ఈ శకటం ఆకట్టుకుంది.
• కేంద్ర ప్రజా పనుల విభాగం (CPWD) శకటంలో నూతన పార్లమెంట్‌ భవనం, నేతాజీ సుభాష్‌ చంద్రబోస్‌ చిత్రాన్ని ప్రదర్శించారు.
• ఛత్రపతి శివాజీ పట్టాభిషేకం జరిగి 350 ఏళ్లు పూర్తయిన సందర్భంగా ఆ థీమ్‌తో మహారాష్ట్ర తమ శకటాన్ని ప్రదర్శించింది.

అమేయ శక్తిలో ‘ఆమె’.. గణతంత్ర పరేడ్‌ను నడిపించిన నారీమణులు

తెలుగు రాష్ట్రాల శకటాలు ఇలా..

ఈ పరేడ్‌లో తెలుగు రాష్ట్రాల శకటాలు ఆకట్టుకున్నాయి. అమర వీరులను స్మరించుకునేలా తెలంగాణ శకటాన్ని తీర్చిదిద్దారు. దీనికి ‘జయ జయహే తెలంగాణ’గా నామకరణం చేశారు. తెలంగాణ ఉద్యమ సమయంలో ఈ పల్లవితో ప్రజాకవి అందెశ్రీ రాసిన గీతం విశేష ప్రాచుర్యం పొందింది. శకటంలో కుమురం భీం, రాంజీ గోండు, చాకలి ఐలమ్మ వంటి పోరాట యోధుల విగ్రహాలతో పాటు రాష్ట్ర కళాకారుల ప్రదర్శనలు ఆకట్టుకున్నాయి. విద్యారంగం థీమ్‌తో ఏపీ శకటాన్ని ప్రదర్శించారు.