F2: ‘ఎఫ్‌ 2’.. హిందీ రీమేక్‌?

‘ఎఫ్‌ 2’.. 2019లో విడుదలైన ఈ సినిమా బ్లాక్‌బస్టర్‌ చిత్రంగా నిలిచింది. ప్రముఖ కథానాయకుడు వెంకటేష్‌, వరుణ్‌ తేజ్‌ ప్రధాన పాత్రల్లో నటించిన ఈ చిత్రం ప్రేక్షకులకు గుర్తుండిపోయే వినోదాన్ని అందించింది. అనిల్‌ రావిపూడి తెరకెక్కించిన ఈ సినిమాలో తమన్నా, మెహరీన్‌ కథానాయికలుగా నటించారు. దిల్‌ రాజు నిర్మించిన ఈ సినిమా విజయంతో దీనికి సీక్వెల్‌గా ‘ఎఫ్‌ 3’ని రూపొందించారు. భిన్న వయసులున్న ఇద్దరు వ్యక్తులు వారి భార్యలతో ఎదుర్కొంటున్న సమస్యలను వినోదాత్మకంగా తెరకెక్కించి అభిమానుల మనసులను గెలుచుకున్నారు. తెలుగు ప్రేక్షకుల మొహాల్లో చిరునవ్వులు చిందించిన ఈ సినిమాను ఇప్పుడు హిందీలో రీమేక్‌ చేయడానికి సన్నాహాలు చేస్తున్నట్లు తెలుస్తోంది. ‘అనిల్‌ రావిపూడి దర్శకత్వంలో దిల్‌ రాజు ఈ చిత్రాన్ని త్వరలో హిందీలో రీమేక్‌ చేయనున్నారు. ఈ సినిమాలో ఇద్దరు నటుల కోసం బాలీవుడ్‌ హీరోలతో చర్చలు కూడా జరుపుతున్నారు. పరిశ్రమలో అన్ని భాషల సినీప్రియులకు ఈ చిత్రం వినోదాన్ని పంచుతుందని, త్వరలో దీనికి సంబంధించిన విషయాలను అధికారికంగా దిల్‌రాజు ప్రకటించబోతున్నారు’ అని సన్నిహిత వర్గాలు చెప్పినట్టు సమాచారం.