‘ఛాంపియన్‌’ ఎలా అయ్యాడు?

‘ఛాంపియన్‌’గా ప్రేక్షకుల్ని పలకరించనున్నారు హీరో రోషన్‌. ఆయన.. అనస్వర రాజన్‌ జంటగా నటించిన ఈ చిత్రాన్ని ప్రదీప్‌ అద్వైతం తెరకెక్కించారు. స్వప్న సినిమాస్, ఆనంది ఆర్ట్స్‌ క్రియేషన్స్, కాన్సెప్ట్‌ ఫిల్మ్స్‌ సంస్థలు నిర్మించాయి. ఈ సినిమా డిసెంబరు 25న థియేటర్లలోకి రానుంది. ఈ నేపథ్యంలోనే శనివారం ఈ చిత్ర గ్లింప్స్‌ని విడుదల చేశారు. ఈ ప్రచార చిత్రాన్ని బట్టి.. ఇది ఫుట్‌బాల్‌ ఆటతో పాటు ప్రేమ, దేశభక్తి అంశాల మేళవింపుగా రూపొందిన చిత్రమని అర్థమవుతోంది. రోషన్‌ ఇందులో స్వాతంత్య్రానికి ముందు హైదరాబాద్‌లో నివసించే ఆర్మీ మ్యాన్, ఫుట్‌బాలర్‌ మైఖేల్‌ సి.విలియమ్స్‌ పాత్రలో కనిపించనున్నారు. మైదానంలో ప్రత్యర్థుల్ని సవాల్‌ చేస్తూ తన ప్రతిభను ప్రదర్శించే అతనికి దేశం కోసం ఆడి, ఇంగ్లాండ్‌లో రాణి ఎలిజబెత్‌ను కలుసుకునే అవకాశం వస్తుంది. కానీ, తన జీవితంలో ప్రేమతో పాటు ఇంకొన్ని సవాళ్లు దాగి ఉంటాయి. మరి అవేంటి? చివరికి ‘ఛాంపియన్‌’ ఎలా అయ్యాడనేది ఆసక్తికరం. ఈ చిత్రానికి సంగీతం: మిక్కీ జె మేయర్‌.