Bhagavanth Kesari: నా ఊపిరే నీకు ఉయ్యాల..

మరికొన్ని రోజుల్లో ‘భగవంత్‌ కేసరి’గా ప్రేక్షకులను పలకరించడానికి ముస్తాబవుతున్నారు అగ్రకథానాయకుడు బాలకృష్ణ. అనిల్‌ రావిపూడి ఈ చిత్రాన్ని తెరకెక్కిస్తున్నారు. కాజల్‌ కథానాయిక. శ్రీలీల కీలక పాత్ర పోషిస్తోంది. ఇటీవలే విడుదలైన ఈ సినిమాలోని ‘గణేష్‌’ అనే మొదటి పాటకు మంచి స్పందన వచ్చింది. తాజాగా ఈ సినిమాలోని ‘ఉయ్యాలో ఉయ్యాలా..’ అంటూ సాగే మరో గీతాన్ని బుధవారం విడుదల చేసింది చిత్రబృందం. ‘ఉయ్యాలో ఉయ్యాలా నా ఊపిరే నీకు ఉయ్యాలా.. అవుమల్లా అవుమల్లా గీ సేతుల్లో నిన్ను మొయ్యాలా’ అంటూ బాలకృష్ణ, శ్రీలీల మధ్య ఉన్న తండ్రీకూతుళ్ల బంధాన్ని తెలుపుతున్న ఈ పాట ప్రేక్షకులను ఆకట్టుకుంటోంది. తెలంగాణ యాసలో సాగుతున్న ఈ గీతానికి అనంత్‌ శ్రీరామ్‌ సాహిత్యం అందించగా ఎస్పీ చరణ్‌ ఆలపించారు. సాహు గారపాటి, హరీష్‌ పెద్ది నిర్మిస్తున్న ఈ చిత్రం ఈ నెల 19న విడుదల కానుంది.