గోవాలో భాజపా తొలి జాబితాలో పారికర్‌ తనయుడికి దక్కని చోటు..

పణజీ: గోవాలో గురువారం విడుదలైన భాజపా తొలి జాబితాలో ముఖ్యమంత్రి ప్రమోద్‌ సావంత్‌ సహా 34 మంది పేర్లున్నాయి. దివంగత మాజీ ముఖ్యమంత్రి మనోహర్‌ పారికర్‌ తనయుడు ఉత్పల్‌ పారికర్‌కు పణజీ టికెట్‌ లభించలేదు. సిట్టింగ్‌ ఎమ్మెల్యే ఉండడం వల్లనే ఉత్పల్‌కు అక్కడ అవకాశం కల్పించలేదని, రెండు ప్రత్యామ్నాయ స్థానాలు ఆయనకు సూచించామని పార్టీ గోవా వ్యవహారాల బాధ్యుడు దేవేంద్ర ఫడణవీస్‌ తెలిపారు. తండ్రి ఎమ్మెల్యేగా చేసిన స్థానంలో పోటీ చేయడాన్ని ఉత్పల్‌ పారికర్‌ సెంటిమెంట్‌గా భావిస్తున్నట్లు పారికర్‌ కుటుంబ సన్నిహిత వర్గాలు తెలిపాయి. వేరే స్థానం నుంచి ఆయన పోటీ చేయరని చెప్పాయి. ఉత్పల్‌ను తమ పార్టీలో చేరాలని ఆప్‌ అధినేత అరవింద్‌ కేజ్రీవాల్‌ బహిరంగంగా ఆహ్వానిస్తూ ట్వీట్‌ చేశారు. ఆయన స్వతంత్రంగా పోటీ చేస్తే మద్దతిస్తామని శివసేన ఎంపీ సంజయ్‌ రౌత్‌ ప్రకటించారు.