KTR - Siddaramaiah: హామీలు ఇచ్చేముందు ఆలోచించరా..? కర్ణాటక సీఎం వైరల్‌ వీడియోపై కేటీఆర్‌ ట్వీట్‌

హైదరాబాద్: ‘‘ఎన్నికల్లో ఓట్ల కోసం ఎన్నో హామీలు ఇస్తాం.. అంత మాత్రాన ఫ్రీగా ఇవ్వాలా? మాకు ఇవ్వాలనే ఉంది. అయితే డబ్బులు లేవు’’ అని కర్ణాటక సీఎం  సిద్దరామయ్య (Siddaramaiah) అసెంబ్లీలో మాట్లాడారంటూ ఓ వీడియో వైరల్‌ అవుతోంది. దీనిపై భారాస (BRS) ఎమ్మెల్యే, మాజీ మంత్రి కేటీఆర్‌ స్పందించారు. ఆ వీడియోను రీపోస్ట్‌ చేస్తూ.. కాంగ్రెస్‌పై (Congress) విమర్శలు గుప్పించారు.

‘‘ఎన్నికల్లో ఇచ్చిన వాగ్దానాలు నెరవేర్చడానికి డబ్బులు లేవని సిద్దరామయ్య అంటున్నారు. అలా హామీల ప్రకటన ఇచ్చే ముందు ఆలోచన  చేయరా? తెలంగాణ భవిష్యత్తు కూడా ఇలాగే ఉంటుందా?’’ అని కేటీఆర్ (KTR) ప్రశ్నించారు. కాగా సోషల్‌ మీడియాలో తనపై జరుగుతున్న ప్రచారాన్ని కర్ణాటక సీఎం ఖండించారు. ‘‘భాజపా నేతలు అశ్వత్‌ నారాయణ, సి.టి.రవి దుష్ప్రచారం చేస్తున్నారు. నా వ్యాఖ్యలు వక్రీకరించి ఎడిట్‌ చేసిన వీడియో ప్రసారం చేస్తున్నారు. ఎన్నికల హామీల అమలులో అసమర్థతను అంగీకరించినట్లు దుష్ప్రచారం చేస్తున్నారు. 2018లో హామీలు నెరవేర్చడంలో భాజపా (BJP) విఫలమైంది’’ అని సిద్దరామాయ్య వ్యాఖ్యానించారు.